Градоначалникот на полскиот град Пшемишл на границата со Украина во вторникот на прес-конференција им се заблагодари на италијанските граѓани и организации кои помагаат во справувањето со бегалската криза од Украина. Но, Војчих Бакун немаше ништо добро да му каже на италијанскиот десничар Матео Салвини кој долги години го поддржува рускиот претседател Владимир Путин и често ги споделува неговите ставови.

Наместо добредојде, Салвини од Бакун доби маичка со ликот на Путин и притоа му беше порачано дека за него нема „никаква почит“.

„Имам тука подарок кој сакам заеднички да го однесеме кај бегалците на границата, господине сенатор, за да видат што направи вашиот пријател Путин. Да видат каков човек ви е пријател, што им направи тој човек на овие луѓе“, му порача Бакун на гостинот од Италија.

Салвини се заврте и си замина од прес-конференцијата, неуспешно обидувајќи се да објасни дека се залага за мир и дека сака да им помогне на бегалците.

Салвини беше сликан со иста таква маичка во 2014 година при посетата на Црвениот плоштад во Москва.