В недела ќе се одржат локални избори во Грац, вториот град по големина во Австрија. Партиите го започнаа финишот на предизборната кампања, меѓу нив и Слободарската партија на Австрија (FPÖ), крајно десничарски настроена, која со освоени 13 проценти на изборите за Националниот совет во 2006 година секако не е маргинална.

Кандидат на Слободарската партија на Австрија во Грац е Сузане Винтер.Таа е дипломиран правник и мисли дека знае како се мобилизираат гласачи. И навистина: 3000 слушатели аплаудираат, додека таа од говорницата грми дека Грац е конфронтиран со исламско доселеничко цунами. Местото на исламот е зад Средоземното Море, а пророкот Мохамед е војсководец кој го напишал Коранот додека имал епилептични напади, вели Винтер и додава „На 50-годишна возраст Мохамед се оженил со 6-годишно девојче. Според денешниот систем истиот тој Мохамед е педофил“

Јавното обвинителство на Грац со истрага против Винтер

Политичките противници се вчудоневидени. Но Сузане Винтер во интервју за еден весник отиде уште чекор понатаму – злоупотребата на деца од страна на исламските мажи е широко распространета. Според неа вакви изјави немаат врска со поттикнување нетрпеливост меѓу народите. Јавното обвинителство во Грац мисли поинаку и отвори истрага против неа.

Портпаролот на обвинителството изјави: „Постои сомнение за кривично дело поттикнување на нетрпеливост меѓу народите. За тоа е предвидена казна до две години затвор.“

Поддршка од шефот на партијата

Сузане Винтер доби поддршка од лидерот на нејзината партија Хајнц – Кристијан Штрахе „Дали она што таа го кажа е точно или не? Она што таа го кажа е можеби малку грубо формулирано. Но јас никому не му оспорувам сопствено мислење.“

Инаку и самиот тој и се обрати на публиката со популистички пароли: „Доколку драги Австријци сакате да обезбедите еден христијански Запад и не сакате да ја промените во една муслиманска Европа, тогаш морате слободарски да гласате на изборите, оти само ние сме подготвени да го обезбедиме тоа.“

Слични средства кориси и Хајдер

До големиот раскол пред три години Јерг Хајдер беше силниот човек во партијата. Во меѓувреме тој формира нова партија - Сојуз за иднината на Австрија. И Хајдер се бори за гласови во Грац и користи слични средства: „ Со Господ напомош - Ве поздравувам вака оти уште можам така да кажам, а не морам да речам Алах е голем.“

И Хајдер грми против злоупотребата на правото на азил и наводната закана за Австрија од страна на исламот: „Се додека во исламските држави убиваат луѓе кои сакаат да изградат христијански цркви, ние немаме воопшто никаква причина ним да им ја отвориме вратата и да им дадеме шанси овде во Европа.“