Останува на сила забраната за движење во периодот од 22 до 5 часот изутрина. Бројот на заразени и починати и понатаму е загрижувачки
Фотографија: Nake Batev/AA/picture alliance
Реклама
Македонската Влада денеска одлучи да го продолжи полицискиот час, кој ќе биде на сила до 6 април. Ваквата одлука е донесена по препорака на Комисијата за заразни болести која се состана денеска.
„Актуелната мерка за забрана и посебен режим на движење на граѓаните на целата територија на државата во временскиот период од 22:00 часот до 05:00 часот, продолжува до 6 април“, информираат од Владата.
На седницата на Главниот координативен кризен штаб, на која ресорните министри и претставниците на надлежните институции информираа за состојбата со пандемијата на Ковид-19 во земјата, учествуваше и македонскиот претседател, Стево Пендаровски.
„Иако пандемијата трае повеќе од една година, мора да продолжиме да се однесуваме совесно и одговорно и да ги почитуваме мерките. На тој начин, освен нашето, го штитиме здравјето и животите на нашите најблиски“, порача претседателот.
Министерот за здравство, Венко Филипче, минатата недела на прес-конференција најави дека е можно зајакнување на рестрикциите доколку се влоши епидемиолошката состојба во земјата. Се споменуваше можноста да се зголеми времето на полицискиот час, како и да се скрати работното време на угостителите.
Во меѓувреме пандемијата зема нов залет. Се поголем е бројот на заразени, пред се поради брзото ширење на британскиот сој во земјата. Болниците се преполни, се бара место повеќе од заразените кои имаат потреба од лекарска помош и нега.
Вчера од направени 2.730 тестирања, беа регистрирани 642 нови случаи на Ковид-19 во земјата. Во Скопје, Прилеп и Велес има најголем број на новозаразени лица. Битката со Ковид-19 ја изгубија 25 лица, на возраст од 61 – 91 година. Досега во земјата се направени вкупно 590.276 тестирања на Ковид-19. Вкупната бројка на ковид-дијагностицирани лица во земјата од почетокот на епидемијата изнесува 119.378, бројката на оздравени пациенти е 100.774, на починати е 3.473, а бројот на активни случаи е 15.131.
Македонија и ковид-19: Седете дома и лапајте витамини
Обврска за носење маски, забрането групирање, ретки или никакви социјални контакти... Пандемијата на коронавирусот од корен го промени начинот на живот на луѓето и нивните навики. Пандемијата во Македонија низ фотографии
Фотографија: Aleksandra Najdovska/DW
Ставете маска
И покрај тоа што македонските здравствени власти постојано предупредуваат дека носењето маска е важно за превенција од пандемијата на коронавирус, дел од луѓето сѐ уште се противат на носење маски. За неносење маски казната за граѓаните е 20 евра, за правните лица – 2000 евра. Затоа влезовите на продавниците од почетокот на пандемијата се „украсени“ и со вакви предупредувања.
Фотографија: Aleksandra Najdovska/DW
Рестрикции и на отворено
Во С. Македонија маски мора да се носат и на отворено, а забрането е и групирање на јавен простор на повеќе од 4 лица по 21 часот. Не се групирајте, е апел кој постојано се повторува од страна на надлежните. Резултатите се половични – покрај дисцплинираните, сѐ уште има луѓе кои се групираат и не преземаат превентивни мерки. Оваа празна клупа трпеливо чека на крај на пандемијата и рестрикциите.
Фотографија: Aleksandra Najdovska/DW
Здравствена криза, економска криза
Угостителските објекти работат со ограничено работно време – само до 21 часот. Исклучок се оние со сервис за испорака. Празните ресторани и кафулиња ја отсликуваат новата реалност што ја создаде пандемијата на Ковид-19. Многу фирми, посебно малите, се плашат од пропаѓање. Ќе им бидат ли доволни средствата за помош од државата?
Фотографија: Aleksandra Najdovska/DW
Каде се другарите?
Околу 90% од учениците следат онлајн-настава, а без проблеми се одвива и наставата со физичко присуство, тврди министерката за образование Мила Царовска. Пандемијата ја забрза дигитализацијата на образованието. Но, привремено го запре нормалниот детски живот. Како актуелното намалување на социјалните контакти влијае врз детскиот развој ќе биде веројатно предмет на многу истражувања во иднина.
Фотографија: Aleksandra Najdovska/DW
Помала осаменост со домашно милениче
Домашните миленици, во време на затворање дома, можат да бидат добар чувар од психолошкиот стрес што со себе го носи пандемијата. Според студија на универзитетите Јорк и Линколн, 90% од испитаниците сметаат дека домашното милениче им помогнало во емоционалното справување со „локдаунот“, а дури 96% се уверени дека со помош на домашното милениче останале во добра физичка кондиција.
Фотографија: Aleksandra Najdovska/DW
Сѐ за здравје
Од почетокот на пандемијата на Ковид-19, во пораст е побарувачката по витамини и сѐ што може да придонесе за зајакнување на имунитетот. Конзумирањето суплементи стана секојдневна рутина на многумина. Притоа, голем дел од она што го препорачуваат лекарите, не го покрива Здравствениот фонд, туку е приватен трошок. Лекувањето чини пари, превенцијата исто така. Но, сѐ за здравје!
