Последни подготовки за скринингот на учениците
13 октомври 2021![Symbolbild I Pflegeheim I Coronavirus](https://static.dw.com/image/55146996_800.webp)
Привршуваат подготовките за надлежните институции за почетокот на скринингот за Ковид-19 во училиштата. По направената анализа за бројот на ученици, Министерството за здравство и Министерството за образование и наука ќе почнат да бараат писмена согласност од родителите за тестирање на децата кои ќе бидат опфатени.
Министерот за здравство, Венко Филипче, очекува до следната недела да започне скринингот. Тој апелира до родителите да се согласат децата да бидат тестирани, со земање на обичен брис. Само на тој начин ќе се утврди дали има асимптоматски случаи меѓу децата.
„Сега епидемиолошката ситуација е прилично мирна, немаме заболени деца, немаме хоспитализирани – 10-15 во болницата во Козле, и во ниту една друга институција нема податоци за трансмисија на вирусот во училиштата. Но, важно е да знаеме дали евентуално би откриле асимптоматски носители кај децата“, вели Филипче. Со скринингот ќе бидат опфатени 8 200 деца од основните и средните училишта во земјава.
Не се очекува силен бран
Филипче не очекува во следниот период да има силен бран на Ковид-19. Засега не се размислува и за воведување задолжителна вакцинација, но ништо не е исклучено и се ќе зависи дали досегашниот опфат ќе продолжи и натаму да ги намалува бројките.
„На територијата на цела држава е во пораст опфатот со вакцинација. Сметам дека силен бран не би требало да има, но тоа не значи дека не треба да сме внимателни и треба да ја следиме состојбата. Очигледно дека вакцинацијата го прави своето. Дека има ефект од овој процес е докажано и беше докажано сега во овие градови во кои болниците воопшто не се преоптоварија. И доколку се заразат вакцинирани лица, тоа ќе биде со полесна форма на болеста“, вели министерот за здравство.
Наскоро ќе почне да се применува нова рестриктивна мерка за влез на одредени објекти и настани, при што ќе може да влегуваат само вакцинирани со две дози.