Се трага по ново осомничено лице, кое не мора да е и извршител на нападот, изјави попладнево германскиот министер за внатрешни работи Томас де Мезие, без да наведе други детали.

Германските медиуми јавуваат дека новиот осомничен Анис А., по потекло Тунижанец, им е познат на иследниците. На крајот на ноември, на седница на Центарот за одбрана од тероризам, каде има претставници и на сојузот и на покраините, неговото име било предмет на разговор, јави агенцијата ДПА, повикувајќи се на безбедносни извори. Лицето Анис А. престојувало и во покраината Северна Рајна Вестфалија и во Берлин, користејќи притоа повеќе различни идентитети. Барањето за азил на 23-годишниот Анис А. било одбиено, но тој во Германија имал престој како т.н. толерирано лице.

Тунижанецот имал врски со исламистичката сцена. Според информации на „Зиддојче цајтунг“, НДР и ВДР осомничениот бил категоризиран како „загрозувач“. Тој имал контакти со мрежата на неодамна уапсениот салафист Абу Вала, кој инаку важи за „човек број 1 на Исламска држава во Германија“.

Инаку, вчера исламистичката милиција Исламска држава презеде одговорност за нападот во Берлин, во кој има 12 загинати и 48 повредени лица. Автентичноста на пораката, упатена преку пропагандната агенција на Исламска држава, Амак, досега не е потврдена.