Договорот ќе биде потпишан во Псарадес, на грчката страна на Преспанското Езеро. 

Делегацијата на македонската влада ја предводи премиерот Зоран Заев, а во нејзе се и вицепремиерката, министерката за одбрана Радмила Шекеринска, вицепремиерот задолжен за европски прашања Бујар Османи, министерот за внатрешни работи Оливер Спасовски, како и министерот за надворешни работи Никола Димитров.

Македонската делегација во Грција ќе биде пречекана од грчкиот премиер Алексис Ципрас и од грчката владина делегација. Договорот треба да го потпишат министрите за надворешни работи на двете земји - Никола Димитров и Никос Коѕијас, заедно со медијаторот во преговорите, амбасадорот Метју Нимиц.

На свечената церемонија во Грција свои обраќања треба да имаат премиерите Заев и Ципрас.

Според предвиденото, официјалната средба на двете делегации потоа ќе продолжи на македонската страна на Преспа, во Отешево, каде што двете делегации ќе имаат билатерален разговор и свечен ручек.

За време на целата церемонија, и во Република Грција и во Република Македонија, ќе присутсвуваат Потсекретарката за политички прашања на Обединетите нации, Розмари Ди Карло, Високата претставничка за надворешни работи и безбедносна политика на Европската Унија и Заменик-претседателка на Европската комисија, Федерика Могерини, и Комесарот за европска соседска политика и преговори за проширување на Европската Унија, Јоханес Хан.