Денеска германскиот претседател Франк-Валтер Штајнмајер го посети кризниот регион Ерфтштат заедно со покраинскиот премиер на Северна Рајна Вестфалија, Армин Лашет и се сретна со претставници на екипите за спасување. Штајнмајер апелираше до граѓаните  за единство во поглед на катастрофалните поплави: „Штетите се огромни, за расчистувањето ќе треба време, но подготвеноста за помош мора да трае“, порача претседателот. 

Армин Лашет истакна дека станува збор за катастрофа на векот и огромна национална задача, ветувајќи што е можно поскора помош на настраданите. 

Канцеларката Ангела Меркел исто така планира посета на опустошениот регион во Рајнланд-Фалц, таа утре ќе допатува во местото Шулд.

Додека од многу поплавени области во покраините Северна Рајна Вестфалија и Рајнланд-Фалц водните маси полека се повлекуваат, во урнатините во кризните подрачја и натаму трае потрагата по жртви. До денеска напладне (17.07.2021) бројот на настрадани достигна преку 130. Само во округот Арвајлер според полицијата има преку 90 мртви, но се стравува дека ќе ги има и повеќе, како што соопштуваат од полицијата во Кобленц. Стотици луѓе се повредени, а и тој број може да расте.

Посебно големи се стравувањата поврзани со тешко погодениот регион на Ерфтштат во Северна Рајна Вестфалија: „Претпоставуваме дека има повеќе мртви, но точен број не знаеме“, изјави вчера покраинскиот министер за внатрешни работи Херберт Ројл во Диселдорф. Но, и покрај бројни урнати објекти до денеска напладне нема потврда за смртно настрадани во целосно поплавениот кварт Блесем. Портпаролот на округот меѓутоа истакнува дека ситуацијата и натаму е драматична, во Блесем, јужно од Келн, дојде до лизгање на земјиштето и огромни свлечишта, се создаде цел кратер при што пропаднаа три станбени објекти и една историска тврдина. 

-повеќе: 

Катастрофални поплави во Германија: Се трага по илјадници исчезнати

Поплави во Германија: „Сè е разурнато, сè снема!“

Шокантни слики од поплавите во Германија, расте бројот на жртви

Повеќе од два дена по несреќата, во регионите уште се сметаат за исчезнати десетици луѓе. Илјадници припадници на спасувачките екипи се во акција меѓу другото во Ајфел, каде водната стихија во ноќта кон четвртокот уништи цели населби. Во Северна Рајна Вестфалија има најмалку 43 жртви.

Водата полека почнува да се повлекува од повеќе региони. Во Келн водостојот на Рајна го достигна максимумот од 8,06 метри ноќеска, од денеска почнува да опаѓа.

Но на многу места снабдувањето со електрична енергија и телефонските линии уште се во прекин. Во долината на Ар многу сообраќајници се блокирани, инфраструктурата претрпе тешки штети – уништени се мостови, железницата не функционира во делови од Рајнланд-Фалц. Стотици спасувачи се во потрага по мртви, повредени и исчезнати.

Во Северна Рајна Вестфалија во Васенберг, на границата кон Холандија, по попуштањето на една брана на реката Рур е евакуирана населба со 700 жители, улиците во градот се под вода.