Првиот училишен ден по шестмесечна пауза поради коронавирусот во С. Македонија мина во знак на протоколите за заштита од Ковид-19, но и со протести и бојкоти. На онлајн наставата присуствувале 70% од учениците.
Фотографија: Petr Stojanovski/DW
Реклама
Со задоцнување од еден месец и по повеќе од 6 месечна пауза, за десетици илјади деца и млади денеска повторно започна учебната година во Северна Македонија. Во неколку општини веќе се најавуваат протести и бојкот на наставата, додека во други наставата тече со почитување на протоколите за заштита од Ковид-19.
Според податоците на Министерството за образование (МОН), на физичката настава предвидена за учениците од прво до трето одделение се појавиле 98% од децата, додека останатите 2% останале дома.
Далеку помало е учеството на учениците во онлајн наставата. Од дома во наставниот процес се приклучиле околу 70% од учениците. За нив, според МОН, наставата минала „успешно или со помали проблеми“.
„Од друга страна, 20% од учесниците на онлајн часовите во основно образование пријавиле проблеми во најголем дел со опремата со која располагаат училиштата, интернетот, или опремата на учениците“, соопшти МОН.
Фотографија: Petr Stojanovski/DW
Погледнете како се одвиваше наставата во две скопски училишта денеска:
Со барање да им се овозможи физичко присуство на наставата протестираа или бојкотираа средношколци во Струга, Дебар, Куманово и Тетово; како и родители на основци во Македонска Каменица и Вевчани. Заедничка на сите им е недовербата во онлајн платформата која треба да овозможи следење на наставата и учење од дома.
Премиерот Зоран Заев кој, заедно со министерката за образование Мила Царовска, го посети основното училиште „Јан Амос Коменски“ во Скопје, ги потсети ученици да носат маски, да ги мијат рацете и да одржуваат дистанца.
Фотографија: Petr Stojanovski/DW
Сите мора да бидеме солидарни и да покажеме разбирање во целиот овој процес. Ако сите се придржуваме до мерките полесно ќе ја поминеме оваа училишна година и на тој начин ќе се погрижиме таа да биде единствена и последна ваква“, рече Заев.
Корона: Училишна настава со пречки
Во многу земји повторно расте бројот на новозаразени со коронавирус. Тоа во светски рамки ги става и училиштата пред големи предизвици. Како различни земји се справуваат со проблемот?
Фотографија: Getty Images/L. DeCicca
Тајланд: Настава зад пластична преграда
Околу 250 ученици од училиштето „Ват Клонг Тој“ во Банкок мораат за време на часовите да седат зад пластични прегради. Покрај тоа мора да носат и заштитна маска. Пред секоја училница се наоѓа мијалник и сапун, апарати за мерење температура се поставени на училишниот влез. Строгите мерки покажуваат резултати: од средината на јули во училиштето нема нови инфекции.
Фотографија: Getty Images/L. DeCicca
Германија: Почеток на учебната година со заштитни маски
Учениците во Основното училиште „Петри“ во Дортмунд се пример за начинот на кој со пандемијата се справува најбројната германска сојузна покраина-Северна Рајна Вестфалија. Во сите училишта важи обврска за носење маска. За разлика од останатите 15 покраини, тука маска мора да се носи и за време на часовите. Какви ќе бидат последиците, не може да се процени, учебната година започна на 12. август.
Фотографија: Getty Images/AFP/I. Fassbender
Палестина: Училиштата конечно отворени
И во ова училиште во Хеброн во Западниот Брег, околу 30 километри јужно од Ерусалим, повторно почна настава. Исто така со обврска за маски, а во некои случаи и гумени ракавици. Радоста на наставничката поради почетокот на учењето е забележлива, без оглед на маската. Училиштата во Западниот Брег беа затворени од март. Хеброн се сметаше за епицентар на заразата со коронавирус.
Фотографија: Getty Images/AFP/H. Bader
Индија: Настава преку разглас
Посебна понуда во ова училиште во селото Дандвал во западната индиска држава Махараштра: на учениците кои немаат пристап кон интернет, им се нуди еден вид дополнителна настава за да го надокнадат пропуштеното. Учениците часовите ги одржуваат на отворено, наставниците им се обраќаат преку разглас, со претходни снимки. Оваа индиска држава беше посебно силно погодена од заразата со коронавирус.
Фотографија: Reuters/P. Waydande
Конго: Без измерена температура, нема училиште
Надлежните во престижниот кварт Лингвала во главниот град на државата, Киншаса, сериозно ги сфаќаат мерките за сузбивање на пандемијата на коронавирус. На секој ученик кој ќе стапне во училишниот двор на училиштето „Отец Ким“, прво му се мери телесната температура. Постои обврска за носење маска.
Фотографија: Getty Images/AFP/A. Mpiana
САД: Рекорден број регистрирани со коронавирус
И во САД мерењето телесна температура спаѓа во секојдневниот ритуал на учениците како една од мерките за сузбивање на коронавирусот. Земјата е тешко погодена од корона-кризата, има најголем број починати како последица на Ковид-19.
Фотографија: picture-alliance/Newscom/P. C. James
Бразил: Прегратка за намалување на маките
Маура Силва е наставничка во училиште во западниот дел од Рио де Жанеиро, кон кое гравитираат најголемите сламови на милионската метропола. За барем малку да ја намали болката на своите штитеници, таа развила еден вид „престилка за прегрнување“. Овде е во домашна посета на еден свој ученик и му помага да навлече пластични ракавици пред да може да го прегрне.
