Поранешната прва дипломатка на САД и експерт за меѓународна политика, Медлин Олбрајт почина во 84 година од животот, по долго боледување од рак, соопшти нејзиното семејство.

Медлин Олбрајт беше именувана за државна секретарка во 1996 година од тогашниот претседател Бил Клинтон, функција која ја извршуваше четири години.

Во тој период, таа беше највисоко рангирана жена во историјата на владата на САД. Не беше во можност да се кандидира за претседател на државата затоа што беше родена во Чехословачка. 

Олбрајт важеше за директен и остар дипломат која не се воздржуваше да го каже своето мислење. Беше предводник на дипломатските напори за ставање крај на војната во Косово и одлуката да се бомбардира тогашна СР Југославија.

Откако замина од функцијата, таа го критикуваше претседателот Џорџ Буш поради стратегијата „шокирање со сила“, наместо да ја претпочита дипломатијата во однос на војната во Ирак.