Медиумите јавија дека јапонскиот политичар бил застрелан од зад грб во момент додека држел говор на предизборен митинг во регионот Нара.

Новинската агенција Џији, повикувајќи се на кругови од либералнодемократската партија ЛДП на Абе, јавува дека  по истрелите тој паднал  и обилно крварел од прострелна рана на вратот. 67-годишниот политичар бил итно пренесен во болница,каде подлегнал на повредите.

Новинската агенција Кјодо цитира една жена очевидец: „Тој држеше говор и еден човек дојде од зад него и испука најмалку два куршуми. По вториот куршум, обезбедувањето го опкружи Абе и презеде мерки за реанимација“.

Портпарол на јапонската влада соопшти дека е уапсен осомничениот напаѓач, ТВ НХК јави дека кај него било пронајдено огнено оружје. Локалните медиуми јавуваат дека осомничениот убиец е идентфикуван како Тецуја Јамагами, 41-годишен поранешен војник на морнарицата. По апсењето, на полицијата ѝ изјавил дека пукал во Абе со намера да го убие.

Абе поднесе оставка од премиерската функција во 2020. година, но и натаму претставува важна фигура во владејачката Либерално демократска партија. На чело на јапонската влада беше од 2006. до 2007.и потоа од 2012. до 2020. година, со што е јапонски премиер со најдолг стаж.

Под негово водство, Јапонија сврте забележително кон десно, а Абе се смета за еден од најрешителните поборници на ревизија на пацифистичкиот повоен устав, според кој Јапонија за сите времиња се откажува од војна како суверено право на нацијата и од закана или вршење насилство како средство за решавање на меѓународните спорови.

В недела во Јапонија се одржуваат избори за Горниот дом на парламентот, на кои се очекува ЛДП да однесе јасна победа, со што ќе се забрза дебатата околу уставна промена.

Јапонскиот премиер Фумио Кишида ја прекинал изборната кампања во северниот дел од земјата и се вратил во Токио, каде веднаш е формиран кризен штаб. Во Јапонија важат едни од најстрогите закони во светот во поглед на поседување оружје и земјата се смета за една од најбезбедните во светот.

Атентатот врз Абе предизвика општа згрозеност во светот. Германската министерка за надворешни работи Аналена Бербок на Твитер напиша дека е шокирана од веста за атентат врз Абе. Американскиот министер за надворешни работи Ентони Блинкен изрази најдлабока загриженост, францускиот претседател Емануел Макрон го осуди делото како подмолен напад, додека Русија го оцени за акт на тероризам.