Ревизијата на гласачките ливчиња има за цел да ја смири политичката криза која се заканува дополнително да ја дестабилизира земјата во пресрет на најавеното повлекување на странските трупи од Авганистан.

Околу 23 илјади гласачки кутии се транспортираат од авганистаната армија и НАТО силите во главниот град, каде ќе бидат прегледувани во 100 контролни пунктови.

„Ревизијата ќе трае две до три недели, планирано е во неа да учествуваат стотина тимови“, изјави Ахмад Јусуф Нуристани, шеф на независната изборна комисија. „Се надевам дека овојпат двајцата кандидати ќе ги прифатат резултатите“, дополни тој.

Ревизијата беше прифатена од двајцата претседателски ривали, Абдула Абдула и Ашраф Гани по посредништвото на американскиот државен секретар Џон Кери.

Поранешниот шеф на дипломатијата Абдула не ги призна резултатите од вториот круг на изборите на кои победи Гани, обвинувајќи за измама.

Пребројувањето започна само неколку часа откако авганистанската армија успеа да одбие напад на талибанците врз аеродромот во Кабул. Четворица вооружени талибанци утрово окупираа зграда во изградба на аеродромот, но по четиричасовна борба беа совладани од армиските сили.