Порталот „Еурактив“ на германски јазик пренесува изјава на грчки дипломат кој очекува дека преговорите за спорот околу името меѓу Македонија и Грција ќе добијат на темпо по локалните избори на 15 октомври. Вчерашната посета на шефот на дипломатијата Никос Коѕијас се толкува како чекор кон градење доверба меѓу двете страни. Еурактив како негативни примери од последниот период ги наведува потезите на македонскиот конзул во Њујорк, како и на оној во Канада, кои говореле пред карти на Голема Македонија со знаме на кое е сонцето од Вергина.

До слични сознанија доаѓа и атински „Катимерини“. Прогнозите на грчкиот весник се дека позначајни преговори за името би се случувале во перидот од завршувањето на локалните избори, па сѐ до 2019 година, кога се очекуваат избори во двете земји. Грчките аналитичари, тврди Катимерини, веруваат дека преговорите ќе добијат замав во 2018 година.

Германската државна радио телевизија АРД, на денот на посетата на Коѕијас на Скопје објави репортажа од селото Овчарани, од каде информира за животот и проблемите со кои се соочува македонското малцинство во Грција.

Приказната ја раскажува поранешниот градоначалник на Овчарани, на грчки - Мелити, Панде Ашлаков кој пред судот во Стразбур успеа да го добие спорот против грчката држава која му забранува во пасошот да го користи своето име, туку мора да ја употребува грчката верзија Панајотис Анастасијадис. Сепак, ниту пресудата од Стразбур не го сменила ставот на грчките власти и во неговиот пасош и натаму останува испишана грчката верзија на неговото име.

Ашлаков за АРД раскажува дека во неговото село долги години било забрането да се пејат македонски песни и дека по еден таков инцидент во 1980 години бил и уапсен.