Уште не се знаат вистинските размери на катастрофата по земјотресот и цунамито, конечниот биланс на жртвите може да биде уште поголем
Фотографија: Reuters/Antara Foto
Реклама
По земјотресот и цунамито со преку 800 жртви од петокот, во Индонезија продолжува трката со време во спасувањето на настраданите. Во провинцијата Сулавеси на спасувачите и 36 часа по катастрофата не им успеа да се пробијат до сите места долж брегот. Се стравува дека во тињата и урнатините се засипани уште луѓе и дека конечниот биланс на жртвите ќе биде многу поголем, потпретседателот Јусуф Кала зборува дури и за можни илјадници загинати.
Фотографија: Getty Images/AFP/M. Rifki
Едно аматерско видео на цунамито направено со мобилен телефон во Палу покажува како џиновски бран се движи и го поплавува брегот, однесувајќи со себе луѓе, автомобили, чамци и цели куќи. Многумина биле изненадени на плажата, во подготовки за планиран фестивал. Се засилува и критиката за несоодветно функционирање на системот за рано предупредување по земјотресот од петокот со јачина од 7,5 степени по Рихтер. Портпарол на индонезиската Служба за заштита од катастрофи изјави: „Сирените не се огласија, луѓето не беа свесни за опасноста.“ Националниот центар за метеорологија и географија издал предупредување од цунами, но по половина час го повлекол, што очигледно било прерано.
Фотографија: Reuters/Antara Foto
Во Палу, главниот град на Сулавеси, денеска од урнатините на куќитеуште се слушаат гласови, но на екипите им недостигаат соодветни машини за извлекување на затрупаните. Постои надеж дека помошта ќе почне да стига побрзо откако во меѓувреме е повторно оспособен за сообраќај аеродромот на островот.
Индонезија се наоѓа во сеизмичка област, т.н. Огнен прстен и е подложна на земјотреси. Во текот на летото серијата потреси предизвика смрт на 550 луѓе на индонезискиот остров Ломбок. Во декември 2004. година земјотрес со сила од 9,1 степен го погоди островот Суматра, по што цунами во Индискиот Океан однесе 230.000 животи во 13 земји.
Земјотреси кои го потресоа светот
Од големите земјотреси во Антиохија во 342 и 526 година, до денес, историјата памети огромни потреси кои неретко биле проследени и со гигантски цунами бранови во некои делови од светот.
Фотографија: picture-alliance/D. Nucci/NurPhoto
Централна Италија во рушевини
Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.
Фотографија: picture-alliance/dpa/M. Gambarini
Лабрадорот Лео
Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.
Фотографија: picture alliance/AP Images/L'Osservatore Romano
Танзанија
Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.
Фотографија: Imago/Xinhua
Вежби за децата во Јапонија
Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.
Фотографија: picture-alliance/dpa/M. Taga
Потрага по најблиските (Беичуан, Кина)
Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.
Фотографија: Getty Images/China Photos
Катастрофата во Хаити
На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.
Фотографија: picture alliance/dpa
Земјотресот во Суматра
На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.
Фотографија: Getty Images/S. Platt
Музафарабад, Кашмир
Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.
Фотографија: AFP/Getty Images/F. J. Brown
Л' Аквила- земјотрес и одговорност
Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.