Британскиот престолонаследник Вилијам ќе управува со хеликоптер во служба на брзата помош. Неговата задача ќе биде да одговара на итни повици од секаков карактер, од сообраќајни несреќи до срцеви проблеми.

Доколку ги мине сите потребни тестови, војводата од Кембриџ се очекува следната година да започне со полно работно време да ги извршува задачите во Источно англиската воздушна амбуланта, добротворна организација која обезбедува итна хеликоптерска помош низ источна Англија.

Во септември минатата година, принцот кој е втор во линијата на наследниците на тронот, ја заврши тригодишната обука како пилот на хеликоптер во военото воздухопловство. „Во тој период тој учествуваше во повеќе од 150 спасувачки и трагачки операции“, соопшти неговиот портпарол.

Вилијам ќе ги извршува задачите со полно работно време, но ќе се води сметка и за неговите кралски обврски и должности. 32-годишниот принц најпрво ќе мора да мине низ петмесечен цивилен пилотски тренинг, потоа да полага 14 теоретски и практични тестови, и на крајот да мине и тренинг за итна реакција. На почетокот тој ќе биде копилот, а по дополнителниот тренинг ќе добие шанса да стане и командир на хеликоптер. Годишната плата на британскиот принц ќе биде околу 40 илјади фунти (50 илјади евра), но се очекува тој да ја донира платата во добротворната организација во која ќе работи.