Пропусницата, која пред повеќе од три децении му била издадена на актуелниот руски претседател од страна на источно-германската тајна служба Штази, била пронајдена во архивите во Берлин. Тој сепак не работел за Штази
Фотографија: BStU, MfS, BV Dresden, Abt.KuSch, Nr 7216
Реклама
Пропусницата на Путин му била издадена во 1986 година во време кога како средно-рангиран шпион на советската КГБ бил стациониран во Дрезден, во тогашна комунистичка Источна Германија. Во архивите стоела најмалку од 1990 година, кога двете Германии повторно се обединија.
Била пронајдена од американскиот историчар Даглас Селвиџ, а во вторникот, германскиот таблоид Билд помпезно ја најави како доказ дека Путин работел и за Штази.
Веднаш над серискиот број Б 217590, картичката е потпишана од Путин, а од десната страна е негова црно-бела фотографија. На задната страна, печатите покажуваат дека тој ја користел истата до крајот на 1989 година, кога масовните протести веќе го запечатуваа крајот на Источна Германија.
Германското биро задолжено за архивата на Штази во изјава соопшти дека во тоа време било вообичаено агентите на КГБ да добиваат и пропусници од тајната служба на братската држава, со цел да им се олесни движењето низ земјата.
„Тоа им овозможувало на претставниците на КГБ да имаат пристап и до регионалните канцеларии на Штази. Тоа важело и за Владимир Путин, кој тогаш работел за КГБ во Дрезден. Нема докази дека Путин работел и за Штази“, се вели во изјавата.
Портпаролот на Кремљ, Дмитри Песков во вторникот изјави дека нема ништо невообичаено во тоа што Путин поседувал таква пропусница.
„Како што е добро познато од времето на постоењето на Советскиот сојуз, КГБ и Штази беа партнерски разузнавачки служби и оттука не може да се исклучи размена на такви пропусници“, рече Песков.
Путин работел за КГБ во Дрезден од 1985 до 1990 година.
По падот на Берлинскиот Ѕид во 1989 година Путин, кој тогаш имал ранг на мајор, изјави дека морал да го извади својот пиштол за да сопре маса луѓе да влезат во неговите канцеларии во Дрезден и да ги уништат документите. Тактиката успеала.
За време на престојот, задачата на Путин, кој течно зборува германски, била да регрутира информанти и притоа бил на двапати унапреден. Пред да замине, Путин вели дека тој и други агенти уништиле огромно количество тајни документи.
По враќањето во Русија, Путин застана на чело на ФСБ, наследникот на КГБ, а потоа беше избран и за претседател во 2000 година.
Владимир Путин: Патот до моќта
Владимир Путин е избран за претседател на Русија во четвртиот мандат. Поглед кон подемот на Путин од нискорангиран агент на КГБ до незапирлива политичка сила.
Фотографија: Reuters/D. Mdzinarishvili
Кадет на КГБ
Роден во Санкт Петербург во 1952, Путин се пријави во советската раразузнувачка служба КГБ веднаш по завршувањето на правниот факултет во 1975. Негова прва задача бил надзорот на странски државјани и вработени во конзулатите во родниот град, тогаш со името Ленининград Потоа замина на служба во Дрезден, источна Германија. Тој наводно запалил стотици документи на КГБ по падот на Берлинскиот ѕид.
Лево на фотографијата, младиот Путин стои до тогашниот градоначалник на Санкт Петербург, Анатоли Собчак. Тој му беше професор на Путин и го назначи за свој советник за меѓународни прашања. И покрај корупцискиот скандал на почетокот од службата, Путин не ја загуби работата, токму поради пријателството со Собчак.
Фотографија: Imago/ITAR-TASS
Метеорски подем
Путин набргу се префрли во Москва. Во 1997 рускиот претседател Борис Елцин му додели среднорангирана функција во неговата администрација- позиција која Путин ќе ја искористи за да создаде важни политички пријателства, кои ќе му бидат од полза во наредните децении.
Фотографија: picture alliance/AP Images
Смртта на пријателот
Путин беше длабоко потресен од смртта на Собчак во 2000 година. Откако ученикот политички го надмина својот учител, Собчак стана гласен поддржувал на кандидатурата на Путин за претседател на Русија. Една година претходно, Путин ги искористи своите врски за да бидат отфрлени обвинувањата против Собчак за проневера.
Фотографија: picture-alliance/dpa/S. Chirikov
Привремен претседател
Во јуни 2000 година, Борис Елцин поднесе оставка, отстапувајќу му на премиерот да стане привремен лидер на државата. За време на успешната претседателска кампања, повторно излегоа на површина обвинувањата за корупција против Путин од времето на неговата служба во Санкт Петербург. Марина Салје, пратеничката која ги изнесе обвинувањата, беше замолчена и принудена да го напушти градот.
Фотографија: Imago/ITAR-TASS
Тандемократија
Кога Путин уставно беше спречен да се кандидира за трет последователен мандат во 2008 година, премиерот Дмитри Медведев се кандидираше на негово место. Кога Медведев беше избран, тој го назначи Путин за премиер. Тоа доведе до критики за „тандемократија“ во Москва и многумина беа убедени дека Медведев е марионета на Путин.
Фотографија: Imago/ITAR-TASS
Победа
Во март 2018 година, Владимир Путин е избран за руски претседател во четврти мандат. Путин ќе биде на власт и во наредните шест години, со оглед дека претседателскиот мандат претходно беше продолжен на шест години. Избоrите беа засенети од обвинувањата за нерегуларности и манипулации, како и од фактот дека немаше вистинска опозиција на Путин.
