Втор смртен случај, бројот на заразени достигна 136
БГ
23 март 2020
Најмладиот пациент од коронавирус во земјата има две години, а најстариот 91. Стотици чекаат тестирање. Владата ги прошири мерките за забрана на движење за лицата над 67 и под 18 години.
Фотографија: Regierung Nordmazedonien
Реклама
Нови 22 лица се дијагностицирани со новиот коронавирус во земјава во изминатите 24 часа, а вкупната бројка на заразени достигна 136. Најголемиот дел повторно се од Скопје-15, додека 4 се од Дебар. Втората жртва од вирусот е 63-годишен пациент од Дебар, кому нагло му се влошила состојбата вчера. Статистиката на Инстиутот за јавно здравје покажува дека најмладиот пациент во земјава заболен од коронавирус има само 2 години, а најстариот 91 година. Најголем процент од заразените (23%) се на возраст меѓу 30 и 39 години.
Министерот за здравство Венко Филипче информира дека стотина лица кои биле во контакт со заразената поранешна директорка на Клиниката за кожни болести деновиве ќе бидат тестирани, откако им минал периодот на задолжителна изолација. Ниту еден од нив досега не покажал симптоми на болеста.
Филипче информираше дека откако ќе заврши формално-правната постапка, за сите заразени од коронавирусот ќе се воведе нова терапија на база на антибиотикот сумамед и лекот Кинин, која досега покажала резултати во неколку земји во светот. Но Филипче ги повика граѓаните да не прават залихи од Сумамед на своја рака, откако таков тренд бил забележан изминативе недели, и најави дека издавањето на лекот ќе се ограничи преку ткн. „бели рецепти“.
Владата вечерва одлучи делумно да го измени, и да го дополни полицискиот час кој влезе во сила во неделата. Наместо до 6 часот наутро, тој од вторник 24 март ќе трае до 5 часот наутро, а ќе започнува како и претходно во 21 часот. Но се проширува полицискиот час по старосни групи. За лицата над 67 години забраната за излегување од дома ќе започнува далеку порано, од 11 претпладне и ќе трае до 5 наутро. Малолетниците, под 18 години, пак, ќе можат да се движат од 12 напладне до 21 часот.
Во изолација поради коронавирус? Нема проблем
Со малку креативност можете да ја претворите изолацијата во инспирација. Еве неколку идеи како да го искористите времето во карантин, и да продолжите нормално да живеете дури и затворени во четири ѕида.
Фотографија: picture-alliance/dpa/P. Schickert
Бидете креативни со конзервираната храна
Претворањето на конзервираната храна во нешто вкусно можеби бара малку магија, но сигурно не е невозможно. На пример, експериментирајте со лакса која ги прочистува синусите или пак измешајте конзерва туна со малку пченка и свеж ѓумбир за да го зајакнете вашиот имунолошки систем.
Фотографија: Miguel Medina/AFP/Getty Images
Затворената вежбална не е изговор
Имате доволно начини да ја одржите добрата форма на вашето тело дури и ако не можете да ја посетите вашата вежбална. Загрејте го телото со фитнес вежби или јога со онлајн упатства, а доколку ви е многу здодевно искористете ги и конзервите со храна во вашиот магацин за да ги развиете вашите бицепси и трицепси.
Фотографија: picture-alliance/dpa/K.-D. Gabbert
Време е за пролетно чистење
Искористете ја можноста, засукајте ги ракавите и употребете го вишокот енергија за да го светнете секое ќоше во домот. Ова може да биде најдобриот момент за расчитување на нередот. Можете дури и да ослободите место во плакарите и да зачистите во подрумот.
Целодневното гледање на ТВ серии е гарантиран начин за опуштање на умот и телото. Можеби мини-серијата „Чернобил“ и не е најдобриот избор доколку сте во мрачно расположение. Алтернативата би било нешто полесно, како „Пријатели“. Доколку секој ден потрошите 6 часа и 20 минути на оваа серија, ќе ги изгледате сите 236 епизоди за 14 дена.
Покрај сето слободно време можеби е добар момент да ја избришете прашината од некои постари игри и да се забавувате со оние со кои го споделувате карантинот. Доколку сте сами во изолација, повеќе класични игри денес имаат и онлајн верзии па можете да играте со пријателите преку интернет.
Фотографија: picture-alliance/dpa/S. Stache
Научете нешто ново
Во денешно време можете да научите речиси се онлајн. Можеби секогаш сте сакале да научите некоја нова вештина или дури и јазик. Германски можеби? На интернет ќе најдете многу можности и за бесплатно изучување јазици, па со оглед на слободното време, нема никаков изговор зошто тоа да не го сторите.
Фотографија: Colourbox
Јавете и се на бабата
Вашите роднини секогаш се жалат дека ве гледаат само за празници. Сега е добар момент да им се јавите. Иако веројатноста дека ќе заглавите на телефон 1-2 часа е голема, сепак ќе ви се израдуваат. Притоа, ќе покажете грижа и за нив и за нивното здравје во оваа тешка ситуација, особено за постарите луѓе.
Фотографија: Heike Brauer/Fotolia
Планирајте го следниот одмор
Планирањето одмор е добар начин да избегате од вашата соба, макар и само во мислите. Исполнете го денот замислувајќи си како се релаксирате на Бали или уживате во чистиот планински воздух некаде на Алпите. Само не заборавајте да си купите и патничко осигурување бидејќи никогаш не се знае кога ќе дојде следната криза.
