Путин планира Украинците полесно да добијат руски пасош
ЖА / агенции
27 април 2019
Понудата на Русија, да им овозможи добивање руско државјанство на жителите на источна Украина, која предизвика меѓународен протест, Путин сега ја дополни: планира полесно стекнување руски пасош за сите Украинци.
Фотографија: Reuters/M. Shemetov
Реклама
Русија не исклучува можност наскоро на сите Украинци да им овозможи брзо стекнување руски пасоши. Ова го изјави шефот на Кремљ во Пекинг.
Во средата рускиот претседател потпиша декрет со кој на луѓето од воените подрачја во источна Украина им се поедноставува добивањето руско државјанство. Украинците со постојано место на живеење во „одделни окрузи“ во Доњецк и Луганск во иднина на таков начин треба да имаат можност да станат руски државјани со поедноставена постапка. Руските власти за барањата за стекнување државјанство според декретот треба да донесат одлука во рок од три месеци.
Во источниот дел од Украина, украинските владини трупи веќе со години водат борба против сеператистите поддржувани од Русија. Со понудата за стекнување државјанство, Русија сака натамошно надградување на своето влијание во оваа област.
Планот на Русија наиде на остри критики во Украина, но и во ЕУ и САД. Украина за темата побара и одржување седница на Советот за безбедност на ОН.
Уште не е јасно како новоизбраниот украински претседател Зеленски ќе се позиционира кон РусијаФотографија: Reuters/V. Ogirenko
Во врска со новата регулатива за добивање руски пасоши во сеператистичките украински области, Владимир Путин за новинската агенција ТАСС изјави дека Русите не треба да стравуваат во поглед на своите социјални права и пензии: „Не постои никаков сомнеж, сите социјални права ќе бидат остварувани“.
Критиките според кои новата регулатива во преголема мерка ќе го оптовари рускиот буџет, Путин ги нарече „хорор приказни“: „Ние сё однапред испланиравме“, истакна тој.
Одлуката на Путин следува непосредно по претседателските избори во Украина, на кои минатата недела Володимир Зеленски убедливо го победи актуелниот претседател Петро Порошенко. Путин истовремено понуди средба со Зеленски заради што поскоро завршување на конфликот меѓу двете земји.
Хронологија на поморските тензии помеѓу Украина и Русија
На инцидентот на 25 ноември, во кој руски бродови ракетираа украински воени пловила, му претходеа месеци на тензии во Азовското Море. ДВ пишува за главните фази на конфронтацијата во Керчкиот проток.
Фотографија: Universität der Bundeswehr
Соработка меѓу Украина и Русија - на хартија
„Сите прашања поврзани со Азовското Море и Керчкиот проток треба да се решаваат само со мирни средства заеднички или со договор помеѓу Украина и Русија ...“ Ова се зборовите од преамбулата на Договорот меѓу Украина и Руската Федерација за соработка во користењето на Азовското Море и теснецот Керч, постигнат во 2003 година.
Фотографија: Imago/Russian Look/S. Fomine
Конфликти во Керчкиот проток - врз која основа?
Според меѓународното право, трговските и воените бродови треба слободно да пловат во Азовското Море и теснецот Керч. Сепак, по анексијата на Крим од страна на Русија во март 2014 година, реалноста во Азовското Море почна да се движи сѐ подалеку од овој правен принцип.
Фотографија: Reuters/A. Bainozarov
ЕУ ја критикува Русија
Ситуацијата се влоши со отворањето на Керчкиот мост, кој ги поврзува Таманскиот и Кримскиот полуостров. Пред тоа, според резолуцијата на Европарламентот од 25 октомври 2018 година, руските инспекции во Азовското Море беа селективни и не го нарушуваа слободното движење на бродови и товар. Но, од пролетта 2018, според прес-службата на ЕУ, Москва демонстративно создава пречки во трговскиот превоз.
Фотографија: picture-alliance/Winfried Rothermel
„Прекумерни“ проверки во Азовското Море
Проверките на бродовите од и кон украинските пристаништа руските граничари ги одолговлекуваа по неколку часа. Пристаништата, трговците и превозниците имаа значителни загуби. Според податоците од Киев, од крајот на септември 2018 година, повеќе од 200 бродови биле подложени на интензивни проверки, меѓу кои 120 биле со знамиња на земјите на ЕУ.
Фотографија: picture-alliance/Tass/V. Timkiv
Аргументите на Русија
Во меѓувреме, руската страна ги обвинува Украинците за ескалација во Азовското Море. Така, на крајот на март 2018 година, Украина го запре и потоа го конфискуваше рибарскиот брод „Норд“ во Азовското Море кој е регистриран на Крим.
Фотографија: Facebook/DPSUkraine
Керчката криза
Најголемиот инцидент досега во теснецот Керч се случи на 25 ноември, кога патувањето на украински воени бродови од Одеса кон Азовското Море заврши со гранатирање од страна на руските граничари кои тврдеа дека Украинците нелегално ја преминале руската граница. Сите три украински брода беа запленети и испратени до пристаништето Керч.
Фотографија: Reuters/P. Rebrov
„Нелегално ја преминаа границата и влегоа во територијалните води“
Русата безбедносна служба ФСБ тврди дека украинските бродови „илегално ја преминале границата и влегле во територијалните води на Русија“. На состанокот на Советот за безбедност на ОН, заменикот-амбасадор на Русија, Димитри Појански, присилното запленување на бродовите го образложи со „основано сомнение дека тие превезуваат радикали кои се заканиле дека ќе го кренат во воздух мостот на Керч".
Фотографија: Reuters/P. Rebrov
Поморското право ѝ дава право на Украина
Како што вели Даниел-Еразмус Кан, професор на Универзитетот на Бундесверот во Минхен, преминувањето на Керчкиот проток е регулирано на ист начин како и преминувањето на Босфорот или кој било друг морски теснец во светот. „Според Конвенцијата за поморско право од 1982 година, Украина има неограничено право на транзит низ Керчкиот теснецот. За ова, не е потребна дозвола од Русија", вели Кан.
