Издадени се наредби за обдукција и идентификување на телата на починатите во пожарот, додека се испитува и дали има и други починати лица. За некои од починатите ќе биде потребна ДНК анализа за да се утврди нивниот идентитет. Според првичните сознанија, меѓу починатите нема медицински персонал, соопшти Основното јавно обвинителство. 

„До раните утрински часови, обвинителите сослушаа вработени во модуларната болница со цел да се утврдат причините за пожарот. Во исто време, издадена е наредба за обезбедување на снимките од видеонадзорот во и околу објектот. Увидот ќе продолжи и во текот на денешниот ден, а јавните обвинители заедно со експертите на МВР, ќе ги обезбедат доказите за целосно расчистување на трагичниот настан“, соопшти ОЈО. 

Од Министерството за здравство информираат дека во ковид центарот за време на пожарот имало вкупно 26 пациенти, останатите 12 се на лекување во тетовската болница и се надвор од животна опасност. „Нема настрадани здравствени лица, неколкумина се со полесни повреди. Министерството за здравство изразува сочувство до семејствата на загинатите и длабоко жалење за страотната несреќа, велат од Министерството. 

Тридневна жалост во Тетово 

Градоначалничката Теута Арифи утрово, по состанокот на Кризниот штаб, соопшти дека во градот е прогласена тридневна жалост. Таа соопшти дека преживеаните 12 пациенти се во стабилна состојба и вети итна помош за семејствата на настраданите. И Црвениот крст соопшти дека во знак на солидарност и хуман гест, на семејствата на загинатите во пожарот во ковид-центарот во Тетово ќе им додели еднократна парична помош во висина од 30.000 денари.