Расте бројот на жртви во Албанија, се трага по преживеани
БГ
27 ноември 2019
Спасувачките екипи во Албанија продолжија да работат и длабоко во ноќта во потрага по преживеани по катастрофалниот земјотрес. Од Скопје веќе пристигна помош во експерти, спасувачи и опрема.
Фотографија: Reuters/F. Goga
Реклама
Бројот на жртвите во земјотресот кој го зафати регионот околу албанскиот главен град Тирана порасна на 22, а стотици се повредени. Војска, полиција и екипи на итна помош ги пребаруваат остатоците од урнатините во надеж дека ќе спасат евентуални преживеани. Досега од урнатините се спасени повеќе од 40 луѓе. Најголемиот дел од жртвите настрадале во градовите Драч и Туман.
Македонската влада и градот Скопје денеска испратија спасувачки екипи и механика кои треба да помогнат во спасувачките акции. Екипите се веќе пристигнати во Албанија, а дел од експертите веќе се вклучени на терен.
Вечерва околу 18 часот нов земјотрес со јачина од 4,7 степени го погоди регионот околу Драч што предизвика дополнителна нервоза и паника кај тамошните жители.
Фотографија: picture-alliance/AP Photo
Стотици жители на градот се плашат да се вратат во своите домови и вечерва ќе ја минат во импровизирани шатори на улиците на Драч. Околу 600 луѓе досега добиле медицинска помош како резултат на повреди од земјотресот.
Албанското министерство за одбрана соопшти дека спасувачките операции ќе продолжат во текот на целата ноќ.
Балканскиот полуостров лежи на линијата меѓу две големи тектонски плочи- африканската и евроазиската- и земјотресите се чести. Движењето на јадранските микро-плочи исто така продуцира земјотреси.
Најсилниот земјотрес кој го погодил регионот во изминатите децении е скопскиот во 1963 година.
Земјотреси кои го потресоа светот
Од големите земјотреси во Антиохија во 342 и 526 година, до денес, историјата памети огромни потреси кои неретко биле проследени и со гигантски цунами бранови во некои делови од светот.
Фотографија: picture-alliance/D. Nucci/NurPhoto
Централна Италија во рушевини
Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.
Фотографија: picture-alliance/dpa/M. Gambarini
Лабрадорот Лео
Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.
Фотографија: picture alliance/AP Images/L'Osservatore Romano
Танзанија
Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.
Фотографија: Imago/Xinhua
Вежби за децата во Јапонија
Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.
Фотографија: picture-alliance/dpa/M. Taga
Потрага по најблиските (Беичуан, Кина)
Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.
Фотографија: Getty Images/China Photos
Катастрофата во Хаити
На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.
Фотографија: picture alliance/dpa
Земјотресот во Суматра
На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.
Фотографија: Getty Images/S. Platt
Музафарабад, Кашмир
Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.
Фотографија: AFP/Getty Images/F. J. Brown
Л' Аквила- земјотрес и одговорност
Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.
