Двајца пациенти во Европа повторно заразени со коронавирус
БГ /РТР
25 август 2020
Двајца пациенти на европскиот континент кои еднаш го прележале коронавирусот се повторно заразени. Кај експертите расте загриженоста за имунитетот на луѓето поради вториот бран на пандемијата.
Фотографија: picture-alliance/dpa/B. Pedersen
Реклама
Два случаи, по еден во Белгија и во Холандија, и претходно откриениот во Хонг Конг на човек кој бил заразен четири ипол месеци по првата инфекција со коронавирусот, се првите документирани ре-инфекции. Тоа ги зголеми стравовите за ефективноста на потенцијалните вакцини против коронавирусот, иако експертите велат дека ќе бидат потребни уште многу повеќе случаи на повторна зараза за да се оправда стравот.
Белгискиот виролог Марк Фан Ранст вели дека случајот во неговата земја е жена која за првпат се заразила со Ковид-19 во март, а вторпат во јуни. Тој очекува и други случаи на повторна зараза.
„Не знаеме дали ќе има голем број. Мислам дека веројатно не, но мора да почекаме“, вели вирологот.
„Можеби вакцината ќе мора да се повторува секоја година, или на секои две или три години. Но јасно е дека нема да имаме нешто што ќе трае во следните 10 години“, вели Ранст. Во случајот на белгиската жена, според експертот, симптомите биле лесни, а реинфекцијата би можела да се должи на тоа што нејзиниот организам не создал доволно антитела за да се спречи повторувањето, иако веројатно доволно за да се ограничи болеста.
Холандскиот Институт за јавно здравје исто така забележал случај на ре-инфекција. Вирологот Марион Копманс изјави дека се работело за постар пациент со ослабен имунитет. Таа вели дека досега биле познати случаи на луѓе кои долго боледувале од вирусот и болеста се повторувала. Но повторната инфекција, како во случаите во Белгија, Холандија и Хонг Конг, бара генетски тест на обете зарази за да се утврди дали има разлики во вирусот.
Тече финалната клиничка фаза на корона-вакцината на Модерна
01:24
This browser does not support the video element.
Според Копманс, која е советничка на холандската влада, ре-инфекцијата била очекувана.
„Не ме плаши тоа што кај некој се повторила инфекцијата. Мораме да видиме дали тоа почесто ќе се случува“, вели таа.
Коментирајќи го случајот во Хонг Конг, портпаролката на СЗО Маргарет Харис вели дека и покрај анегдотските извештаи за ре-инфекции, важно е таквите случаи да се документираат.
Некои експерти велат дека е веројатно таквите случаи да се појавуваат поради зголеменото тестирање, а не затоа што вирусот мутирал или се шири на поинаков начин.
Во секој случај, ваквата појава е загрижувачка за професорот Дејвид Стрејн, прв човек на академскиот комитет на Британското медицинско здружение.
„Прво, тоа значи дека првичната инфекција не довела до заштита. Втората причина е што вакцинацијата можеби нема да ни ја донесе надежта која ја чекаме“, вели Стрејн.
Корона: Училишна настава со пречки
Во многу земји повторно расте бројот на новозаразени со коронавирус. Тоа во светски рамки ги става и училиштата пред големи предизвици. Како различни земји се справуваат со проблемот?
Фотографија: Getty Images/L. DeCicca
Тајланд: Настава зад пластична преграда
Околу 250 ученици од училиштето „Ват Клонг Тој“ во Банкок мораат за време на часовите да седат зад пластични прегради. Покрај тоа мора да носат и заштитна маска. Пред секоја училница се наоѓа мијалник и сапун, апарати за мерење температура се поставени на училишниот влез. Строгите мерки покажуваат резултати: од средината на јули во училиштето нема нови инфекции.
Фотографија: Getty Images/L. DeCicca
Германија: Почеток на учебната година со заштитни маски
Учениците во Основното училиште „Петри“ во Дортмунд се пример за начинот на кој со пандемијата се справува најбројната германска сојузна покраина-Северна Рајна Вестфалија. Во сите училишта важи обврска за носење маска. За разлика од останатите 15 покраини, тука маска мора да се носи и за време на часовите. Какви ќе бидат последиците, не може да се процени, учебната година започна на 12. август.
Фотографија: Getty Images/AFP/I. Fassbender
Палестина: Училиштата конечно отворени
И во ова училиште во Хеброн во Западниот Брег, околу 30 километри јужно од Ерусалим, повторно почна настава. Исто така со обврска за маски, а во некои случаи и гумени ракавици. Радоста на наставничката поради почетокот на учењето е забележлива, без оглед на маската. Училиштата во Западниот Брег беа затворени од март. Хеброн се сметаше за епицентар на заразата со коронавирус.
Фотографија: Getty Images/AFP/H. Bader
Индија: Настава преку разглас
Посебна понуда во ова училиште во селото Дандвал во западната индиска држава Махараштра: на учениците кои немаат пристап кон интернет, им се нуди еден вид дополнителна настава за да го надокнадат пропуштеното. Учениците часовите ги одржуваат на отворено, наставниците им се обраќаат преку разглас, со претходни снимки. Оваа индиска држава беше посебно силно погодена од заразата со коронавирус.
Фотографија: Reuters/P. Waydande
Конго: Без измерена температура, нема училиште
Надлежните во престижниот кварт Лингвала во главниот град на државата, Киншаса, сериозно ги сфаќаат мерките за сузбивање на пандемијата на коронавирус. На секој ученик кој ќе стапне во училишниот двор на училиштето „Отец Ким“, прво му се мери телесната температура. Постои обврска за носење маска.
Фотографија: Getty Images/AFP/A. Mpiana
САД: Рекорден број регистрирани со коронавирус
И во САД мерењето телесна температура спаѓа во секојдневниот ритуал на учениците како една од мерките за сузбивање на коронавирусот. Земјата е тешко погодена од корона-кризата, има најголем број починати како последица на Ковид-19.
Фотографија: picture-alliance/Newscom/P. C. James
Бразил: Прегратка за намалување на маките
Маура Силва е наставничка во училиште во западниот дел од Рио де Жанеиро, кон кое гравитираат најголемите сламови на милионската метропола. За барем малку да ја намали болката на своите штитеници, таа развила еден вид „престилка за прегрнување“. Овде е во домашна посета на еден свој ученик и му помага да навлече пластични ракавици пред да може да го прегрне.
