Жестока реакција на државниот министер во германското МНР, Михаел Рот по синоќешните напади во македонското Собрание. Остра осуда и од германското и австриското МНР
Фотографија: picture-alliance/dpa/B. Grdanoski
Реклама
Остри зборови на осуда за инцидентите пред и во македонското Собрание дојдоа од Берлин и Виена утрово. Најдиректен во осудата беше државниот министер во германското Министерство за надворешни работи, Михаел Рот кој ги прогласи насилниците за „националистички варвари“.
„Националистички варвари сакаат да ги уништат последните остатоци на демократската култура во Македонија. Ужаснат сум“, напиша Рот на својот Твитер профил утрово.
Доцна синоќа и германското МНР се јави на Твитер со „остра осуда“ на нападите во парламентот во Скопје.
Со соопштение се огласија и претседавачот- шефот на австриската дипломатија Себастијан Курц и генералниот секретар на ОБСЕ, Ламберто Заниер.
Сведоштва за „крвавиот четврток“ во македонскиот парламент
Невидени хаотични слики: Откако мнозинството пратеници го избра пратеникот на ДУИ Талат Џафери за претседател на Собранието, на противење на пратениците од ВМРО ДПМНЕ, во законодавниот дом упадна толпа насилни луѓе.
Фотографија: Reuters/O. Teofilovski
Навала пред вратите на Парламентот
По изборот на Талат Џафери за нов претседател на Парламентот, од иницијативата „За заедничка Македонија“ ги повикаа граѓаните да излезат уште помасовно на протест, со цел да ја спасат државата од, како што истакнаа, влегување во сценарио од кое нема враќање назад. Толпата почна да притиска кон вратите на Собранието за да влезе во него.
Фотографија: Reuters/O. Teofilovski
Слабо присуство на полицијата
Неколку големи групи граѓани влегоа во парламентарната зграда, во пленарната сала, во фоајето и во други простории на парламентот, откако полицијата не го спречи првиот бран од граѓани кои протестираа против изборот на нов претседател на Собранието.
Фотографија: Reuters/O. Teofilovski
Незапирливо „заземање“ на Парламентот
Меѓу оние кои упаднаа имаше и маскирани лица со качулки, кои фрлаа столици во собраниските простории и медиумска опрема.
Фотографија: Reuters/O. Teofilovski
„За заедничка Македонија“ во Собранието
Во закондавниот дом завладеа хаос. Тука беа организаторите на иницијативата „За заедничка Македонија“, тука беа и министри и пратеници на ВМРО-ДПМНЕ.
Фотографија: picture-alliance/dpa/B. Grdanoski
Знамиња и песни
Дел демонстранти ја „зазедоа“ и Пленарната собраниска сала, каде што пееја песни и вееја знамиња.
Фотографија: picture-alliance/abaca/B. Ademi
Напади врз пратениците на СДСМ
Демонстранти навлегоа и во прес-центарот, каде што беа пратениците на СДСМ и ДУИ и почнаа да ги тепаат со столови и со сè што ќе им дојде до рака. Крвнички напаѓани беа Зоран Заев, Дамјан Манчевски, Максим Димитриевски, Радмила Шеќеринска, Хари Локвенец, Зијадин Села. Полиција немаше.
Фотографија: picture-alliance/abaca/N. Batev
Полицијата се „разбуди“
По повеќе од еден час по почетокот на инцидентите, полицајци влегоа во Собранието и се обидоа да ги извлечат пратениците од прес-центарот, но беа избркани од толпата што ги држеше како заложници. Толпата се забарикадира во прес-центарот.
Фотографија: Reuters/O. Teofilovski
Евакуација на повредените пратеници
Некаде пред 22 часот дојдоа и специјалци, па почнаа да се обидуваат да ги вадат повредените од забарикадираниот прес-центар.
Фотографија: Reuters/O. Teofilovski
Извлечени пратениците
Кратко пред полноќ пратениците од парламентарното мнозинство беа извлечени од Собранието, а пред него и понатаму останаа насобраните демонстранти.
Вкупно стотина лица се повредени, од кои четворица се пратеници. Целото Собрание е демолирано, тврдат новинари, од кои дел исто така беа напаѓани.
Фотографија: Reuters/O. Teofilovski
Шатори пред Собранието
Припадници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство, поставија шатори пред Собранието и најавија дека ќе останат таму „колку што е потребно“, за да ја „одбранат Македонија“.
Фотографија: (c) DW/Kostadin Delimitov
10 фотографии1 | 10
„Нападите на неколку членови на Собранието, упадот во зградата на Парламентот – срцето на демократијата на земјата – се шокантни. Ова е акт на заплашување, напад на претставувањето на луѓето кој што јас категорично го осудувам“, рече Курц.
Заниер порача дека насилството мора веднаш да престане, а органите на редот да ја обезбедат безбедноста.
Европратеникот од редот на германските социјалдемократи Кнут Флекенштајн доцна синоќа во изјава за ДВ порача дека „ВМРО-ДПМНЕ го преминала Рубикон“.
„Заврши времето за убави зборови. ЕУ ќе мора да преземе мерки. За тоа ќе разговараме утре (28.04.)“, рече Флекенштајн за ДВ.
Социјалдемократот во германскиот Бундестаг, Јосип Јуратовиќ им порача на своите колеги од Европските народни партии и од германските конзервативни ЦДУ и ЦСУ да размислат кого поддржуваат во Македонија.
„До кога овие партии ќе ги поддржуваат Груевски и ВМРО-ДПМНЕ во Македонија?“, праша Јуратовиќ.
