Рускиот масакр во Виницја остави најмалку 23 мртви
15 јули 2022
Украинските власти велат дека крстосувачки ракети од типот „Калибр“ лансирани од руска воена подморница во Црното море предизвикала голема штета врз клиника, продавници и станбени објекти во Винициа, град оддалечен 268 километри југозападно од главниот град Киев. Локалниот гувернер соопшти дека противвоздушната одбрана урнала две од вкупно четири руски ракети кои го погодиле градот.
Шефот на полицијата соопшти дека се идентификувани само шест тела на жртвите, додека 39 лица се сметаат за исчезнати. Три деца помали од 10 години се меѓу загинатите.
„Тоа беше зграда на медицинската организација. Кога погоди првата ракета, стаклото падна од прозорците. Кога дојде вториот напад, беше толку заглушувачки што ушите се уште ми ѕвонат. Ја откорна целата надворешна врата“, вели 74-годишната жителка на Винициа, Свитлана Кубас.
Повеќе од 36 станбени згради се оштетени а нивните жители евакуирани. Ракетите предизвикале и пожар во кој се оштетени преку 50 автомобили на паркинг.
Терористичка закана
Русија демантираше дека напаѓала цивилни цели.
„Русија напаѓа само воени цели во Украина. Нападот во Винициа беше насочен кон офицерска зграда каде украинските сили се подготвувале“, изјави шефот на постојаната мисија на Русија во ОН, Евгени Варганов. Меѓу погодените објекти е и Офицерскиот дом, концертна сала од советско време.
Украинскиот претседател Володимир Зеленски ги повтори апелите Русија да биде прогласена за земја спонзор на тероризам. Нападот се случи во момент кога владини претставници од 40 држави се среќаваат во Хаг, Холандија на координација за истражување и процесуирање на потенцијалните воени злосторства во Украина.
„Ниту една друг земја во светот не претставува таква терористичка закана како Русија. Ниту една друга земја во светот не си дозволува секој ден да користи крстосувачки ракети и ракетна артилерија за да уништува градови и да убива цивили“, рече Зеленски во ноќното обраќање до граѓаните.
Винициа е еден од најголемите украински градови, со предвоено население од 370 илјади луѓе. Илјадници бегалци од источна Украина, каде се водат најтешките битки, побараа прибежиште во овој град кој е далеку од фронтот.