Руска блокада на истрагата за употреба отровен гас во Сирија
ЖА / агенции
18 ноември 2017
Русија повторно во Советот за безбедност на ОН со вето ја запре натамошната истрага за употреба на хемиско оружје во Сирија, која на предлог на Јапонија требаше да продолжи уште еден месец.
Фотографија: Reuters/B. McDermid
Реклама
Јапонија предложи резолуција која постојниот мандат на т.н. Заеднички механизам на ОН и Организацијата за забрана на хемиско оружје (ОПЦВ) за истражување на хемиските напади во Сирија, требаше да го продолжи за 30 дена, во надеж дека ќе бидат откриени нови докази.
Ова е веќе единаесетто вето на Русија во Советот за безбедност на ОН, поврзано со сирискиот конфликт. Русија е постојана членка на највисокото тело на ОН. Тимот од ОН и Организацијата за забрана на хемиско оружје (ОПЦВ), упатиобвинувања на адреса на сириската влада за употреба на нервен гас. Русија, сојузникот на сириската влада, го критикува ангажманот на експертите, последниот извештај на специјалистите за хемиско оружје рускиот амбасадор во ОН, Васили Небенсја демонстративно го отфрли како „глупав виц“.
Москва и во четвртокот со вето блокираше резолуција предложена од САД. „Русија го прокоцкува нашето време“, изјави во таа прилика видно изнервираната американска амбасадорка во ОН, Ники Хејли. Контрапредлогот за продолжување на мандатот на Заеднички механизам на ОН и Организацијата за забрана на хемиско оружје (ОПЦВ), доставен потоа од Русија, Боливија и Кина, беше отфрлен од трите западни вето-сили во ОН- САД, Велика Британија и Франција. Дали експертскиот тим ќе биде расформиран или сепак ќе добие можност за натамошна истрага, останува отворено прашање.
Алепо: Уништувањето на раскошниот град
Алепо пред војната беше метропола полна со живот, омилена туристичка цел и економско срце на Сирија. Денес источниот дел на градот е разурнат. Фотографиите од пред војната и сега ги покажуваат размерите на уништувањето.
Џамијата Омејади пред војната
Ова е фотографија од 2010 година. Бунтовите во арапскиот свет тогаш не беа стигнати до Сирија и Алепо. Џамијата е изградена во 775 година и е дел од Светското културно наследство на УНЕСКО.
Фотографија: Reuters/K. Ashawi
Џамијата Омејади денес
Џамијата беше тешко оштетена во борбите во 2013 година. На 24 март 2013. се урна минарето изградено во 11. век. Денес џамијата наликува на напуштена руина.
Фотографија: Reuters/O. Sanadiki
Амамот Ел Нахасин пред војната
Во амамот во старото градско јадро на Алепо посетителите уживаат во мирот по направената бања. Фотографијата е направена есента 2010 година.
Фотографија: Reuters/K. Ashawi
Амамот Ел Нахасин сега
Шест години потоа амамот не зрачи со мир и спокојство. „Раните“ од војната му се видливи.
Фотографија: Reuters/O. Sanadiki
Цитаделата на Алепо пред војната
Цитаделата на Алепо е една од најстарите и најголемите тврдини на светот. Голем дел од објектот е изграден во 13. век.
Фотографија: Reuters/S. Auger
Цитаделата денес
Некогашната туристичка атракција е во голем дел уништена и денес како сениште се издига над градот.
Фотографија: Reuters/O. Sanadiki
Старото градско јадро некогаш
24. ноември 2008 година: Старото градско јадро на Алепо. Луѓе седат во кафулињата, сместени како во рамка од шарени светла.
Фотографија: Reuters/O. Sanadiki
Старото градско јадро денес
13 декември 2016: Старото градско јадро е престорено во прав и пепел.
Фотографија: Reuters/O. Sanadiki
Трговскиот центар Шахба пред војната
Божиќни подароци висат закачени на таванот на трговскиот центар Шахба во декември 2009 година. Петкатниот трговски центар беше отворен во 2008 година и се вбројуваше во најголемите во Сирија.
Фотографија: Reuters/K. Ashawi
Трговскиот центар Шахба денес
„Трајно затворен“ - оваа информација се појавува на Гугл кога се пребарува поимот „Shahba-Mall“ денес.Трговскиот центар беше тешко оштетен во воздушните напади во 2014 година.
Фотографија: Reuters/A. Ismail
Пазарот Ал Зараб пред војната
Влезот во пазарот Ал Зараб во 2008 година, облеан во топла светлина.
Фотографија: Reuters/O. Sanadiki
Пазарот Ал Зараб денес
Декември 2016: Влезот во пазарот е уништен речиси целосно.
