САД го направија првиот чекор кон целосна забрана на увоз на енергенси од Русија, додека Европа размислува како да ја намали зависноста од рускиот гас и нафта во екот на војната во Украина.

„Нема да ја субвенционираме војната на Путин“, соопшти Бајден објаснувајќи дека одлуката ќе биде „тежок удар“ за способноста на Кремљ да ја финансира војната. Тој притоа прифати дека и Американците ќе мораат да плаќаат повисока цена за горивото. 

„Одбраната на слободата ќе чини“. 

Бајден рече дека САД се координирале со европските сојузници, кои се далеку позависни од руските енергенси. ЕУ најави план за надминување на зависноста од руските енергенси, но спроведувањето на планот ќе трае неколку години. За разлика од САД кои се голем производител на нафта и гас, Европа е зависна од увозот на енергенси, и тоа 90% од гас и 97% нафта. Русија обезбедува околу 40% од европските потреби на гас и една четвртина нафта. 

Цената на гасот и нафтата сепак растат и во САД последниве недели, проследени со највисоката инфлација во последните 40 години. Цената на галон бензин од минатата недела досега порасна за повеќе од половина долар и достигна рекордни 4,17 долари. Одлуката на Бајден беше поддржана од обете партии во американскиот Конгрес и Сенат.  

ЕУ ќе оди чекор по чекор  

Во Европа, германскиот канцелар Олаф Шолц се спротивстави на забраната за увоз на руските енергенси, објаснувајќи дека ЕУ нема друг начин да ги задоволи своите потреби, како за домаќинствата, така и за индустријата.

Велика Британија најави дека планира да се ослободи од увозот на руски енергенси до крајот на оваа година.

Првите луѓе на ЕУ разговараат на истата тема во Версај. Планот е Унијата да се ослободи од руските енергенси „далеку пред 2030 година“.
„Се согласивме да ја намалиме зависноста од рускиот гас, нафта и јаглен“, се наведува во нацртот на декларацијата од самитот. Намерата е тоа да се стори преку диверзификација на увозот на гас и развој на обновливите извори на енергија. Според проценките, на тој начин би можел да се намали рускиот увоз за две-третини до крајот на годинава.

„Мора да станеме независни од руската нафта, гас и јаглен. Не смееме да зависиме од добавувач кој експлицитно ни се заканува“, порача претседателката на Европската комисија, Урсула фон дер Лајен.