Предлозите САД во Авганистан да задржат 10 илјади војници во период од две години по завршување на НАТО воената мисија, во Белата куќа ги презентирал командантот на НАТО-мисијата, Џозеф Дандорф, пишуваат „Њујорк тајмс“ и „Вол стрит џурнал“.

Во тек е расправа за овој предлог на генералот на безбедносните сили во Авганистан, Џозеф Дунфорд, кој е поткрепен и со мислењето на тајните служби. Неговата реализација и понатаму зависи од тоа дали авганистанскиот претседател, Хамид Карзаи, наскоро ќе го потпише билатералниот договор за сигурност помеѓу двете земји со кој се одредува меѓународно воено присуство во Авганистан и по 2014. година.

Вашингтон се надева дека доколку биде потпишан овој договор на 10- те илјади американски војници ќе им се придружат уште две до три илјади НАТО војници од другите земји членки.

Во моментов во Авганистан има 37.500 американски и 19.000 НАТО војници од земјите членки.

„Ако не биде можно останувањето на 10 илјади американски војници, ќе сметаме дека работата е неуспешна и подобро да не останува ниеден“, цитираат весниците изјави од воени кругови. Военото раководство на САД е уверено дека помалку од 10 илјади војници не се во состојба да вршат доволна заштита на офицерите на тајните служби и на дипломатите.