Американскиот претседател Џо Бајден најави официјално завршување на американскиот воен ангажман во Ирак и тоа до крајот на оваа година. По приемот на ирачкиот премиер Мустафа ал-Кадеми во Белата Куќа, Бајден рече: „Нашата соработка против тероризмот ќе продолжи и во оваа нова фаза.“ Според американскиот претседател, САД и натаму ќе му даваат поддршка на Багдад во борбата против џихадистичката милиција „Исламска држава“. Бајден не наведе точна бројка за идниот број на американски војници во Ирак. Во моментов во таа земја има уште 2500 припадници на американската армија.

Повеќе:

Зошто е Ирак толку важен за Американците

САД: Повлекувањето од Авганистан и Ирак е неодговорен потег

Од минатата година, американскиот ангажман во прва линија се состои во обука и советување на ирачките безбедносни сили. Во мандатот на Доналд Трамп од Ирак се повлече голем дел од американските трупи. Затоа, експертите не сметаат со некакви длабоки практични промени.

САД во Ирак предводат меѓународна коалиција која во регионот се бори против „Исламска држава“. Ангажманот на американските војници во земјата е спорен. Пред сѐ ирачките партии и милиции кои имаат блиски врски со Иран бараат итно повлекување на американската војска. На три месеци пред планираните парламентарни избори, премиерот Ал-Кадеми е под притисок, пред сѐ од страна на проиранските милиции, чие влијание во земјата се зголемува. Од почетокот на годината проиранските милиции извршија над 50 ракетни и напади со дронови врз американските бази во Ирак. Освен тоа, има и натаму активни ќелии на „Исламска држава“.

Ал-Кадеми во Белата куќа рече дека „Америка му помага на Ирак“ и дека односите на двете земји денес се „посилни од кога било досега“. Тој укажа на „партнерството во сферата на економијата, здравството, образованието и културата“.

Бајден вети американска помош и за зајакнување на енергетската мрежа и снабдување во Ирак, како и во борбата против климатските промени и пандемијата на коронавирусот.