САД: „Понапредни ракетни системи“ за Украина
1 јуни 2022![Наскоро во Украина? Американскиот ХИМАРС, артилериски ракетен систем М142 со висока мобилност](https://static.dw.com/image/61992224_800.webp)
САД планираат да ѝ испратат на Украина понапредни ракетни системи за да ѝ помогнат во одбраната, најави претседателот на САД, Џо Бајден. Во текстот за Њујорк тајмс, Бајден наведе дека руската инвазија на Украина ќе заврши по дипломатски пат, но дека САД мораат да обезбедат клучно вооружување и муниција за да ѝ дадат на Украина адути на преговарачката маса.
„Поради таа причина одлучив на Украинците да им обезбедиме напредни ракетни системи и муниција кои ќе им овозможат попрецизно да ги гаѓаат клучните цели на бојното поле во Украина“, напиша Бајден. Сепак, тој нагласи: „Ние не ја охрабруваме ниту ѝ овозможуваме на Украина да напаѓа надвор од нејзините граници“. Белата куќа соопшти дека Украина ветила дека ќе го стори тоа.
Бајден не даде никакви информации за кои ракетни системи конкретно станува збор. Претходно, меѓутоа американската влада соопшти дека размислува за снабдување МЛРС (системи за повеќекратно лансирање ракети) и ХИМАРС (артилериски ракетни системи со висока мобилност) од американско производство. Системите можат да лансираат повеќе прецизно водени проектили врз цели одалечени дури 70 километри - многу подалеку од артилеријата која Украина ја има во моментов. Исто така, се верува оти се попрецизни од своите руски еквиваленти.
Овие системи ќе бидат дел пакетот за вооружување од 700 милиони долари, кој ќе биде претставен денеска, и кој уште вклучува муниција, противбатериски радари, одреден број радари за воздушно набљудување, дополнителни против-тенковски проектили, како и противоклопно оружје, соопштија претставниците на Белата куќа.
Вооружувањето за Украина со ракети од долг дострел предизвика загриженост на Запад дека овие системи би можеле да се користат за напад на цели во територијата на Русија, што би можело да доведе до ескалација на конфликтот.
Дека САД нема да ѝ испратат на Украина ракетни системи кои можат да досегнат до територијата на Русија соопшти вчера и американскиот претседател Бајден. „Нема да испратиме во Украина ракетни системи кои можат да извршат удар на Русија“, изјави Бајден за новинарите.