Белата куќа синоќа соопшти дека САД се во војна против џихадистите од „Исламска држава“ (ИД). Државниот секретар на САД Џон Кери, кој е на турнеја низ Блискиот Исток за формирање на широка коалиција против ИД, вчера не го употреби терминот „војна“ за квалификување на проширувањето на американската воена операција против ИД во Ирак и Сирија, туку оцени дека тоа е „антитерористичка операција“ која ќе трае определено време, додека не бидат исполнети нејзините цели. Пентагон и Белата куќа, меѓутоа, ги отстранија сите сомненија како го сфаќаат конфликтот.

„САД се во војна со ИД, и исто така продолжуваме да сме во војна со Ал Каеда и нејзините сојузници ширум светот“, изјави портпаролот на Белата куќа Џош Ернест. Од минатиот месец досега американските борбени и беспилотни авиони нанеле 160 удари врз ИД во Ирак. Инаку за „војна“ против ИД говореше и министерството за одбрана на САД. Претходно, пак, министерот за надворешни работи Џон Кери во телевизиско интервју децидно одбегнуваше да говори за војна против терористичките милиции. И претседателот Барак Обама во неговото обраќање до нацијата во ноќта во среда навечер ниту еднаш не го спомена зборот војна.