САД - четворица мртви за време на безредијата пред Конгресот
ЖА / агенции
7 јануари 2021
Сенатот и Претставничкиот дом ја продолжија седницата прекината по упадот на поддржувачи на Трамп, за да го потврдат Џо Бајден како претседател
Фотографија: Tasos Katopodis/Getty Images
Реклама
Сенатот и Претставничкиот продолжија со работа откако безбедносните сили ја обезбедија зградата на Капитол Хил.
На конгресната седница треба да биде потврдена победата на Џо Бајден, демократскиот предизвикувач на републиканецот Доналд Трамп, на изборите на 3 ноември.
Синоќа седницата беше прекината откако поддржувачи на претседателот Доналд Трамп упаднаа во зградата, предизвикувајќи невидени сцени на насилство. Сенаторите и конгресмените беа привремено евакуирани, а потпретседателот Мајк Пенс одведен на безбедно место. Во Вашингтон беше воведен полициски час. Повеќе сојузни држави испратија единици на Националната гарда за заштита на Конгресот во Вашингтон. Полицијата соопшти дека пред зградата на Конгресот бил најден експлозив и молотови коктели во едно возило.
Фотографија: Andrew Harnik/AP/picture alliance
Во насилните инциденти околу Капитол смртно настрадаа најмалку четири лица. Една жена загинала откако било пукано во неа, како што соопшти полицијата, но околностите за нејзината смрт не се јасни. Три други лоца починале од здравствени компликации. Повредени се 14 полицајци, од кои двајца тешко, а уапсени се 52 лица.
Упадот во Конгресот се случи откако Доналд Трамп им се обрати на повеќе илјади свои приврзеници близу Белата куќа, повторувајќи ги обвинувањата дека победата му е украдена со изборна измама, за што досега не приложи никакви докази, а судовите ги отфрлија неговите жалби како неосновани.
Како течеше упадот на поддржувачите на Трамп во Капитол
Доналд Трамп, сѐуште актуелен претседател, долго ги подбуцнуваше своите најверни симпатизери. Последица: некои од нив на 6.01.2021 упаднаа во срцето на американската демократија.
Фотографија: Leah Millis/REUTERS
Создавање набој
Бројот на фанатични поддржувачи на Трмап пред Конгресот во САД растеше преку цел ден. Во почетокот, полицијата успеваше да одржува ред.
Фотографија: Olivier Douliery/AFP/Getty Images
Први судири
Паралелно со заедничката седница на двата дома на Конгресот, Сенатот и Претставничкиот дом, на која требаше официјално да биде потврдена победата на Џо Бајден на претседателските избори, пред Капитол се собираа приврзеници на поразениот претседател Доналд Трамп. Дојде до први судири со полицајците кои требаше да го обезбедуваат Конгресот.
Фотографија: Stephanie Keith/REUTERS
Преслаб кордон
Сѐ поразјарената толпа сакаше да продре во Капитол. Полицајците се обидуваа да ги спречат. На некои агресивни поддржувачи на Трамп им успеа да влезат во зградата.
Фотографија: Win McNamee/Getty Images
Упад во Капитол
Дел од демонстрантрантите успеаја да продрат длабоко во зградата, дури до вратите на Сенатот.
Фотографија: Win McNamee/Getty Images
Одбрана на последниот бастион
Обезбедувањето се обидуваше да ги држи во „шах“ насилниците во влезната хала. Политичарите во Сенатот низ задна врата беа изведени на безбедно место.
Фотографија: Manuel Balce Ceneta/AP Photo/picture alliance
Еден се проби
Во меѓувреме, еден од приврзениците на Трамп успешно се проби покрај полицајците и упадна во Сенатот. Од трибината за посетители тој скокна во пленарната сала.
Фотографија: Win McNamee/Getty Images
Со пиштоли спремни за пукање
Истите слики се повторуваа во другите крила на Капитол. И Претставничкиот дом беше цел на натрапниците. Припадниците на обезбедувањето на Конгресот ги запираа - со вперени пиштоли.
Фотографија: J. Scott Applewhite/AP Photo/picture alliance
Непријателско преземање?
Симпатизерите на Трамп навлегуваа сѐ подлабоко во зградата, сѐ до ходниците со канцелариите на Конгресот. Таму некои се распослаа на работните маси на пратениците.
Фотографија: Saul Loeb/AFP/Getty Images
Надвор од контрола
Еден од натрапниците го „присвои“ и пултот за говор на претседателката на Претставничкиот дом, Ненси Пелоси и со него се шеташе низ Капитол. Никој не го запре.
Фотографија: Win McNamee/Getty Images
Во засолниште
Пленарните сали беа евакуирани. Некои побараа засолниште во галеријата на Претставничкиот дом. Репортерите сведочеа дека биле поделени гас-маски, како заштита од солзавец.
Фотографија: Andrew Harnik/AP Photo/picture alliance
Солзавец врз Конгресот
На силите на безбедноста не им остана ништо друго освен да ја растурат разулавената толпа, употребувајќи солзавец.
Фотографија: Andrew Caballero-Reynolds/AFP/Getty Images
Засилувањето го оконча хаосот во Капитол
Полициските сили добија засилување, Националната гарда поита во помош, а градоначалничката на Вашингтон воведе полициски час до раните утрински часови. Така во Вашингтон ноќта полека се врати мирот.
