Во писмото до Европската унија, Европската централна банка и Меѓународниот монетарен фонд, лидерот на Неа Демократија, Антонис Самарас, денеска (23.11) пишува дека неговата партија работи консеквентно за успех на мерките за штедење и реформи за да се врати довербата на пазарите.

Претходно, Самарас одбиваше ваква определба во писмена форма и со тоа предизвика криза пред исплаќањето на наредната транша помош за Грција од осум милијарди евра, без која земјата ќе банкротира. Во писмото, Самарас претпазливо вели дека дел од мерките за штедење, кои досега не донеле успех, треба да се разгледаат повторно, но „се‘ во рамки на програмата“.

Писмото на Самарас доаѓа откако ЕУ се закани дека нема да дозволи наредната транша помош за Грција да биде исплатена доколку земјата не даде писмена гаранција дека ќе ги спроведува реформите и ќе се држи до мерките за штедење. Засега е нејасно дали ЕУ ќе се задоволи со писмото на Самарас.

Автор: ЕМФ/дпа

Редактор: Г. Чутаноски