Светот се сеќава на „Денот Д“
6 јуни 2014![](https://static.dw.com/image/17688746_800.webp)
Со низа свечености шефовите на држави или влади од цел свет денеска го одбележуваат истоварувањето на сојузничките сили на Нормандија пред 70 години, со што беше направен пресврт во Втората светска војна. Францускиот претседател Франсоа Оланд и американскиот претседател Барак Обама зборуваа на гробиштата на кои се закопани 4400 американски војници загинати на „Денот Д“. Обама нагласи дека светот „може да биде вечно благодарен“. Шести јуни 1944 година беше почеток на ослободувањето на Европа од националсоцијализмот.
Францускиот претседател Оланд на гробиштата во Колвил-сур-Мер потенцираше дека истоварувањето на Нормандија останува обврска за светот и денес да работи на мирот. „Денот Д“ го „промени светот“, рече Оланд.
Американскиот претседател Обама денеска во рамки на свеченостите се поклони пред повеќе стотици ветерани и рече: „Господа вашето присуство овде не‘ исполнува со понизност.“ На 6 јуни 1944-та се бранеа демократијата и слободата. „Ова барање стои напишано со крв на овој брег“, рече Обама, по што многумина од присутните станаа и апалудираа.
Прославата на Нормандија е засенета од конфликтот во Украина. Првпат по анексијата на Крим од страна на Русија во март годинава, германската канцеларка Ангела Меркел имаше средба со рускиот претседател Владимир Путин. Тие кусо се поздравија, а атмосферата беше студена. Двајцата попладнево, инаку, присуствуваат на централната свеченост во Уистреам, заедно со уште дваесетина други шефови на држави или влади.