УНИЦЕФ: Има опасност од „загубена Ковид-генерација“
ЕМФ | агенции
20 ноември 2020
УНИЦЕФ предупредува дека рестрикциите во време на пандемија, кои се однесуваат и на децата и младите, може да доведат до „загубена Ковид-генерација“.
Фотографија: Andreas Arnold/dpa/picture alliance
Реклама
Поради многуте корона-рестрикции во медицинската и социјалната сфера, од кои се опфатени и младите, УНИЦЕФ на Светскиот ден на правата на децата предупредува од опасност од „загубена Ковид-генерација“. Секоја деветта инфекција со коронавирус во светот е инфекција на дете. Прекинот на важни услуги е најголема закана за децата, изјави директорката на УНИЦЕФ, Хенриета Форе. „Колку подолго трае кризата, толку поголемо е влијанието врз образованието, здравството, исхраната и благосостојбата на децата. Иднината на цела една генерација е во опасност“, предупреди Форе.
Фотографија: picture-alliance/dpa/M. Mohammed
Во околу една третина од 140 земји кои биле предмет на истражување, се намалил бројот на децата кои добиле одредени медицински услуги и третмани, како вакцини или амбулантно лекување, а намалени се и посетите од социјални работници. Причина за тоа е стравот од зараза.
Како да разговарате со децата за коронавирусот?
01:17
This browser does not support the video element.
Се’ уште околу 265 милиони деца не добиваат оброк на училиште, а секој трет ученик на светот, односно околу 572 милиони деца, е лично погоден од мерките на затворање на училиштата.
УНИЦЕФ проценува дека 6 до 7 милиони мали деца, пред се’ во Африка и Јужна Азија, страдаат од потхранетост, што значи зголемување од околу 14%. Се проценува дека 150 милиони деца до средината на 2020 година паднале во „повеќедимензионална сиромаштија“.
Последиците од рестрикциите во време на пандемија, според УНИЦЕФ, може да бидат разорни. „Со прекинот на животно важни услуги и се’ поголемата потхранетост, во наредните 12 месеци би можеле да умрат два милиона деца, а бројот на мртвородени да се зголеми на 200.000“, предупредува УНИЦЕФ.
Корона: Училишна настава со пречки
Во многу земји повторно расте бројот на новозаразени со коронавирус. Тоа во светски рамки ги става и училиштата пред големи предизвици. Како различни земји се справуваат со проблемот?
Фотографија: Getty Images/L. DeCicca
Тајланд: Настава зад пластична преграда
Околу 250 ученици од училиштето „Ват Клонг Тој“ во Банкок мораат за време на часовите да седат зад пластични прегради. Покрај тоа мора да носат и заштитна маска. Пред секоја училница се наоѓа мијалник и сапун, апарати за мерење температура се поставени на училишниот влез. Строгите мерки покажуваат резултати: од средината на јули во училиштето нема нови инфекции.
Фотографија: Getty Images/L. DeCicca
Германија: Почеток на учебната година со заштитни маски
Учениците во Основното училиште „Петри“ во Дортмунд се пример за начинот на кој со пандемијата се справува најбројната германска сојузна покраина-Северна Рајна Вестфалија. Во сите училишта важи обврска за носење маска. За разлика од останатите 15 покраини, тука маска мора да се носи и за време на часовите. Какви ќе бидат последиците, не може да се процени, учебната година започна на 12. август.
Фотографија: Getty Images/AFP/I. Fassbender
Палестина: Училиштата конечно отворени
И во ова училиште во Хеброн во Западниот Брег, околу 30 километри јужно од Ерусалим, повторно почна настава. Исто така со обврска за маски, а во некои случаи и гумени ракавици. Радоста на наставничката поради почетокот на учењето е забележлива, без оглед на маската. Училиштата во Западниот Брег беа затворени од март. Хеброн се сметаше за епицентар на заразата со коронавирус.
Фотографија: Getty Images/AFP/H. Bader
Индија: Настава преку разглас
Посебна понуда во ова училиште во селото Дандвал во западната индиска држава Махараштра: на учениците кои немаат пристап кон интернет, им се нуди еден вид дополнителна настава за да го надокнадат пропуштеното. Учениците часовите ги одржуваат на отворено, наставниците им се обраќаат преку разглас, со претходни снимки. Оваа индиска држава беше посебно силно погодена од заразата со коронавирус.
Фотографија: Reuters/P. Waydande
Конго: Без измерена температура, нема училиште
Надлежните во престижниот кварт Лингвала во главниот град на државата, Киншаса, сериозно ги сфаќаат мерките за сузбивање на пандемијата на коронавирус. На секој ученик кој ќе стапне во училишниот двор на училиштето „Отец Ким“, прво му се мери телесната температура. Постои обврска за носење маска.
Фотографија: Getty Images/AFP/A. Mpiana
САД: Рекорден број регистрирани со коронавирус
И во САД мерењето телесна температура спаѓа во секојдневниот ритуал на учениците како една од мерките за сузбивање на коронавирусот. Земјата е тешко погодена од корона-кризата, има најголем број починати како последица на Ковид-19.
Фотографија: picture-alliance/Newscom/P. C. James
Бразил: Прегратка за намалување на маките
Маура Силва е наставничка во училиште во западниот дел од Рио де Жанеиро, кон кое гравитираат најголемите сламови на милионската метропола. За барем малку да ја намали болката на своите штитеници, таа развила еден вид „престилка за прегрнување“. Овде е во домашна посета на еден свој ученик и му помага да навлече пластични ракавици пред да може да го прегрне.
