Министерството за одбрана на Јужна Кореја јавува за знаци кои најавуваат испалување нови балистички ракети од страна на Северна Кореја. САД се закануваат со масивен воен одговор, Кина и Русија повикуваат на воздржаност.
Може да се очекува комунистичкото раководство во Пјонгјанг да нареди испалување на нови балистички ракети, како и повторно тестирање на интерконтинентална ракета, изјави соработник на Министерството за одбрана од Сеул утрово на седница на парламентарната Комисија за одбранбени прашања.
Северна Кореја вчера го изврши својот шести и досега најголем нуклеарен тест и со тоа значително го ескалира конфликтот со меѓународната заедница. Била тестирана хидрогенска бомба, како што јави официјален Пјонгјанг, која е повеќекратно посилна од атомските бомби. Според кинески наводи, експлозијата предизвикала земјотрес со јачина од 6,3 степени.
Јужнокорејското министерство за одбрана денеска најави привремено стационирање на американскиот ракетен одбранбен систем ТХААД и на провокацијата од северниот сосед одговори со воена вежба во чии рамки изврши испалување своја ракета.
Претседателот на САД Доналд Трамп претходно упати закани до раководството во Пјонгјанг дека во краен случај, своите сојузници ќе ги бранат и со атомско оружје. На барање на САД, Јапонија и Јужна Кореја за најновата провокација од Северна Кореја денеска ќе расправа и Советот за безбедноност на ОН, вторпат во една недела. Прашање е дали ќе биде одлучено натамошно заострување на економските санкции против Пјонгјанг.
Со оглед на растечките тензии поради севернокорејската нуклеарна програма, Русија и Кина повикаа на воздржаност. Секој непромислен чекор може да води до експлозија, предупреди рускиот заменик-министер за надворешни работи Сергеј Рјабков денеска. „Посилниот и попаметниот“ мора да демонстрира воздржаност, изјави тој, алудирајќи на американските закани со масивен воен напад во случај Северна Кореја да им се закануваат на САД и нивните сојузници. Тој е убеден дека одговорот на најновите ракетни тестови не може да биде воведување нови санкции, иако не ја исклучи ни таа можност.
Сличен е ставот и на кинеското Министерство за надворешни работи, кое препорачува „симнување на температурата“, а не натамошно разгорување на конфликтот. На Северна Кореја ѝ било пренесено длабокото незадоволство на Пекинг поради најновиот ракетен тест.
За што е способна севернокорејската армија?
Северна Кореја повторно го привлекува вниманието на светската јавност. Тестирањето на интерконтиненталните ракети наидува на остри критики. Земјата има една од најголемите армии во светот. Но, продолжува да се вооружува
Фотографија: Reuters/KCNA
Меѓу најбројните армии во светот
Севернокорејската армија има 700 илјади војници и околу 4,5 милиони резервисти. Речиси секој петти жител на земјата е во војска. Сите мажи во комунистичкиот режим мораат да учествуваат во воената обука. Поради тоа, Северна Кореја има двојно повеќе војници од соседната Јужна Кореја.
Фотографија: Getty Images/AFP/E. Jones
Различни воени орудија
Според податоците наведени во Глобалниот индекс за вооружување, Северна Кореја во 2017 година располага со 76 подморници, 5.025 тенкови и 458 борбени авиони. На оваа фотографија од 2013 година, лидерот Ким Јонг Ун е сликан во командната централа на армијата.
Фотографија: picture-alliance/dpa
Воена парада
Севернокорејскиот режим секоја година ја демонстрира својата сила на воена парада во главниот град Пјонгјанг. Парадите воглавно се одржуваат за време на некој важен јубилеј на комунистичката земја или семејството Ким.
Фотографија: picture-alliance/dpa/KCNA
Интерконтинентални ракети
САД во четвртокот потврдија дека Северна Кореја успешно тестирала балистичка интерконтинентална ракета. Ракетата од типот „Хвасонг- 14“ е во состојба да ја погоди секоја цел во светот, јави државната новинска агенција КЦНА.
Фотографија: Getty Images/AFP/KCNA
Атомските проби продолжуваат
И покрај острите санкции, Северна Кореја продолжува со својата атомска програма. Само во 2016 година беа извршени пет нуклеарни проби. Јужнокорејскиот министер за одбрана Хан Мин Ко смета дека соседот наскоро ќе го изврши и шестиот тест.
Фотографија: picture-alliance/dpa/KCNA
Закана за светскиот мир
Кина и Русија се единствените земји кои се водат како сојузници на Северна Кореја. Режимот за главен непријател ја смета „империјалистичката сила САД“. Меѓу непријателите уште спаѓаат и Јужна Кореја и Јапонија.
Фотографија: Reuters/K. Hong-Ji
Крај на трпението?
По тестирањето на интерконтиненталните ракети на американското трпение му дојде крајот. Претседателот на САД, Доналд Трамп сака да најде решение со своите сојузници од Г20. Кина и Русија, во секој случај, сакаат да спречат американски напади врз воени цели во Северна Кореја.
