Сексуалното вознемирување на Косово е апсолутна табу тема

Вјоса Ќеркини

Во какво општество живеат напасници кои не се плашат од последици и жртви кои се срамат што станале жртви? Сексуалното вознемирување на Косово е апсолутна табу тема.

Zahir Pajaziti Bulevard in der Stadt Prishtina — Фотографија: Vjosa Cerkini

Жените на Косово на хартија ги имаат сите права. Но, да се изборат за нив во секојдневниот живот- не е лесно. Со тој проблем се среќаваат веќе во семејството, а тоа се провлекува низ сите сфери на животот. На пазарот на работна сила младите жени честопати се чувствуваат како дивеч за отстрел.

А.Б., жртва на сексуално вознемирување, вели:

„Кога завршив факултет, бев без работа и сакав да работам нешто. Бев заинтересирана за работа во една продавница за накит. Со нејзиниот сопственик комуницирав преку СМС-пораки. Неговото прво прашање беше: 'Од каде си?' Му напишав дека сум од Приштина. Второто прашање беше: 'Можеш ли да ми испратиш твоја слика? Можам да те вработам ако спиеш со мене.'“

Оваа млада жена која сака да остане анонимна не го пријавила својот случај во полиција. Била уверена дека полицијата нема да преземе ништо и дека нема да ја заштити. Но, сакала да ги предупреди другите жени. На Фејсбук ја открила групата Albanian girls и таму ја споделила својата приказна со повеќе од 200.000 лица кои ја следат оваа страница.

Луљета Демоли, директорка на Косовскиот центар за истражување на половите, со години се обидува да ја детабуизира темата на сексуално напаствување и вознемирување. Таа ги поттикнува жените да ги изнесат ваквите случаи во јавноста. Но, тоа било и останало - тешко:

„Тешкотиите настануваат кога мора да се борите со патријархалните институции кои не сакаат да го видат она што се случува. Тие на крајот носат одлуки дека сторителот не бил свесен за своите зборови и дела. Конкретно, работевме на тоа сексуалното вознемирање да се етаблира како кривично дело и тоа ни успеа“, вели Демоли.