Германскиот претседател Кристијан Вулф на централатната манифестација во Берлин потсети на почетокот на градењето на Берлинскиот ѕид пред 50 години и жртвите од режимот во поранешната Германската Демократска Република (ГДР). Претседателот Вулф во својот говор потсети и на различни судбини, поврзани со границата меѓу Истокот и Западот.

На 13 август 1961 година раководството на поранешната ГДР започна да ја цементира поделбата на Германија во Берлин. Овој лош историски спомен сепак среќно заврши со паѓањето на Берлинскиот ѕид на 9 ноември 1989 година. Германскиот претседател Вулф нагласи дека слободата на крајот секогаш победува. Ѕидот не падна, туку беше соборен, истакна тој. Вулф се заложи за натамошен ангажман за промени и уште повеќе вистински слободи во Германија. Кон ова припаѓа и подобра интеграција на доселениците.

Берлинскиот градоначалник Клаус Воверајт во својот говор потсети на најмалку 136-те жртви, кои починаа во обидот да ја минат тогашната внатрешно-германска граница. На манифестацијата на Бернауерштрасе присуствуваа поранешни противници на режимот на ГДР, членови на семејствата на жртвите, политичари и граѓани.

Одбележувањето на 50 годишнината од почетокот на изградбата на Берлинскиот ѕид почна уште во текот на ноќта со читање на различни биографии на жртвите во т.н. Капела на помирувањето. Истовремено е отворен нов дел од споменикот за жртвите во поранешната „зона на смртта“ во Берлин.

Автор: АТ/ ТТ/ дв

Редактор: Александра Трајковска