Со премногу работа се заработува – смртоносна болест
ЖА / агенции
17 мај 2021
Оној кој работи над 55 часови неделно, е изложен на значително зголемен ризик од смрт поради срцев или мозочен удар, тврди студија на СЗО и МОТ.
Фотографија: Yoshikazu Tsuno/AFP
Реклама
Студија на Светската здравствена организација (СЗО) и Меѓународната организација за труд (МТО), објавена денеска, покажува дека според проценките, само во 2016 година во светот починале околу 745.000 луѓе од мозочен удар или срцеви заболувања зашто работеле најмалку 55 часа неделно.
Според студијата, бројот на смртни случаи, предизвикани од срцеви заболувања поврзани со долго работно време, меѓу 2000 и 2016 година пораснал за 42%, бројот на смртоносни мозочни удари пак за 19%. Најголем дел од засегнатите биле на возраст меѓу 60 и 79 години, на својата возраст меѓу 45 и 74 години работеле минимум 55 часа неделно. Преработувањето, заклучува СЗО, претставува водечки ризичен фактор за професионални заболувања.
Студијата објавена во стручниот магазин „Environment International" првпат ја истражувала поврзаноста на долгото работно време и загубата на здравје, за таа цел биле анализирани податоци од десетици студии со стотици илјади учесници.
Во многу земји работната недела од 35 до 40 часови е стандард, но првенствено во Јужна Азија и регионот на Западен Пацифик, таа е доста подолга. Таму луѓето со нерегулирана работа често се принудени на долго работно време, истакнува експертот на СЗО, Франк Пега.
СЗО изразува посебна загриженост поради растечкиот број на работни часови, од тоа актуелно се погодени околу девет проценти од светското население.
Кризата со коронавирусот може да значи дополнително засилување на трендот – за време на пандемијата бројот на одработени работни часови се зголемил за десет проценти, вели експертот Пега, повикувајќи се на студија на „Националното биро за економски истражувања" во 15 земји.
„Во многу бранши работата од дома стана правило, но при неа често се топат границите меѓу работењето и слободното време", објаснува директорот на СЗО, Тедрос Адханом Гебрејсус. Истовремено, бројни фирми се принудени на штедење, а ангажираните луѓе мораат да работат подолго, вели Гебрејсус. Но, тој порачува: ниедна работа не вреди толку за човек поради неа да ризикува мозочен удар или срцево заболување. Владите, работодавачите и работниците мораат да се договорат околу границите на работење заради заштита на вработените.
Совети за подобро здравје и расположение во пандемијата
Стресот е постојан придружник на современото живеење. Короната дополнително ја влоши состојбата. Што да се направи за да се остане здрав и во добра форма? Спортување, работа во градина, читање... и уште по нешто.
Кој е новиот омилен спорт на Германците? Пешачење! Студијата на еден здравствен фонд покажува дека 43% од Германците по почетокот на пандемијата одат почесто на пешачење отколку пред тоа. Полека или со побрзо темпо? Сѐ е добро кога сте опкружени со природа, кога гледате зеленило, вода, полиња, шума, море...
Базените, фитнес студијата и другите сали за вежбање се затворени поради пандемијата. Но, тоа не смее да биде изговор. Јога или пилатес во дневна соба, велосипедска тура или трчање во парк - телесната активност им годи на срцето и циркулацијата. Како алтернатива се можни и невообичаени активности, на пример жонглирање или одење по јаже. Сето тоа е можно да се прави на доволно растојание.
Фотографија: picture-alliance/dpa/T. Warnack
Виртуелни патувања
Во време на корона не може да се патува како порано. Притоа, одморот од секојдневието е важен за телесната и душевната благосостојба. Има начин да се патува без да се изложувате на ризик, седејќи на каучот дома, и тоа со помош на големиот број апликации за патување со виртуелни очила. Ако не може да се патува вистински, може барем виртуелно.
Фотографија: Colourbox/L. Dolgachov
Добра книга
Многумина во време на корона имаат повеќе слободно време, затоа што работат со скратено работно време, или затоа што не мора да патуваат до работното место. Според анализа на институтот за истражување на пазарот ГфК, направена по повод Франкфуртскиот саем на книгата 2020, 13% од испитаниците многу почесто посегнуваат по книга отколку пред пандемијата. Добрата книга го намалува стресот и релаксира.
Полни шкафови, преполни подруми, полици со книги кои само што не се урнале од тежина... Кому не му се познати барем дел од овие работи? Расчистувањето може да придонесе да се чувствувате подобро. Дури и науката одамна има утврдено дека ослободувањето од старите работи создава нова енергија и ѝ чини добро на душата.
Фотографија: picture-alliance/dpa/R. Weihrauch
Вкусна храна
Рестораните се затворени во време на локдаун. Со оглед на тоа што многу луѓе седат дома, во Германија сега се готви многу повеќе отколку порано. Наместо брза храна, на менито во многу домови има јадења подготвени со многу љубов од членовите на семејството. Статистиката покажува дека добро оди и бизнисот со т.н. кутии за готвење, во кои се ставени рецепт и состојките кои се потребни за него.
Фотографија: Fotolia/MK-Photo
Градинарство
Садење, полевање, берба - градинарството релаксира дури и кога се нема многу смисла за работа со растенија. И, сеедно е дали се има градина или балкон. „Градинарството и растенијата имаат релаксирачко влијание врз процесите на здравеење и ориентација во животот“, објаснува хамбуршкиот терапевт Роланд Штраус на својата веб-страница.
Фотографија: picture-alliance/dpa
Медитација против стрес
Работа, фамилија, домашни задачи - честопати имаме толку многу обврски, што „не знаеме каде ни е главата“. Но, има начин за опуштање: различни истражувања покажуваат дека медитацијата ни дава поддршка за подобро да излеземе на крај со стресот. Оној кој го релаксира дишењето и духот, тој го опушта и телото, а од тоа профитираат, меѓу другото, и срцето и циркулацијата.