Земјотреси со разорна јачина и натаму ја тресат централна Италија. Последниот, во неделата, за среќа не предизвика човечки жртви, но однесе илјадагодишна историја.
Фотографија: picture-alliance/dpa/M. Guidelli
Реклама
Третиот силен земјотрес кој ја погодува Италија во последните два месеци не предизвика човечки жртви, но удри силно во националниот идентитет, уништувајќи бенедиктанска катедрала, средновековна кула и други омилени знаменитости кои ги преживеаја претходните потреси во планинскиот регион исполнет со мали историски гратчиња.
Серија силни земјотреси во Италија
01:03
This browser does not support the video element.
Загубени или тешко оштетени се антички римски ѕидини, готски и барокни цркви и слики стари со векови. Италијанскиот премиер Матео Ренци изјави дека „душата на нацијата е вознемирена“ поради серијата земјотреси, започнувајќи од смртоносниот на 24 август годинава кој однесе 300 човечки животи, двата помали потреси на 26 октомври, до најголемиот од сите, ударот од 6,6 степени кој се случи во неделата. Тоа е и најсилниот земјотрес кој ја погодува Италија во последните 36 години.
Фотографија: Getty Images/G. Bellini
Околу 8 илјади луѓе во текот на денот беа префрлени во прифатни центри каде ја минаа ноќта, а италијанските служби очекуваат денеска таа бројка да се искачи до 11 илјади.
Ренци вети дека ќе ги обнови куќите, црквите и другите објекти, велејќи дека „во залог е италијанскиот идентитет“.
Најголема штета е пријавена во Норчиа, гратче во Умбрија кое било најблиску до епицентарот. Две цркви се уништени - бенедиктанска црква од 14 век, изградена врз родното место на Св. Бенедикт, и катедралата на Св. Марија позната по своите средновековни фрески.
Фотографија: Getty Images/G. Bellini
Земјотресот беше почувствуван на север сѐ до Салцбург, Австрија, и низ должината на целиот италијански полуостров. Во Рим, оддалечен на 150 километри од епицентарот, луѓето во текот на ноќта истрчаа на улиците во пижами. Катедралата на Св. Павле која датира од 4. век мораше да биде затворена поради напукнатите ѕидови и штета во внатрешните делови. Поради земјотресот беа затворени и други туристички атракции во метрополата.
Фотографија: pictureialliance/AP Photo/Sky Italia
Сеизмолозите велат дека не можат да исклучат и нови потреси, можеби дури и посилни од последниот.
„Ова е нормално за Апенините“, изјави претседателот на италијанскиот национален Институт за геофизика, Карло Дољони. Тој потсети на слична серија од потреси кои се случиле во период од неколку месеци во 1703 година во истиот регион.
Природниот закон диктира дека по такви настани, ќе има уште повеќе земјотреси „што значи дека може да очекуваме неколку земјотреси со магнитуда од 5 степени, и уште повеќе со силина од 4 степени“, вели Дољони.
Земјотреси кои го потресоа светот
Од големите земјотреси во Антиохија во 342 и 526 година, до денес, историјата памети огромни потреси кои неретко биле проследени и со гигантски цунами бранови во некои делови од светот.
Фотографија: picture-alliance/D. Nucci/NurPhoto
Централна Италија во рушевини
Последниот голем земјотрес во Европа се случи во централна Италија. Земјотресот кој удри на 24 август годинава однесе 256 животи, и остави повеќе од 40 илјади луѓе без покрив над главата.
Фотографија: picture-alliance/dpa/M. Gambarini
Лабрадорот Лео
Лабрадорот Лео беше поздравен од папата Франциско на 3 септември годинава за време на беатификацијата на Мајка Тереза. Лабрадорот стана инстант-херој откако во урнатините од земјотресот пронајде четиригодишно дете.
Фотографија: picture alliance/AP Images/L'Osservatore Romano
Танзанија
Земјотрес со јачина од 5,7 степени го погоди северозападниот регион на Танзанија на 10 септември годинава. Во катастрофата загинаа најмалку 16 луѓе, а 250 беа повредени.
Фотографија: Imago/Xinhua
Вежби за децата во Јапонија
Јапонија е екстремно трустно подрачје, и во минатото честопати беше погодувана од силни земјотреси. На 1 септември секоја година, кога се одбележува годишнината од големиот земјотрес од 1923 година, децата во основните училишта учествуваат во специјални вежби за заштита при земјотрес.
Фотографија: picture-alliance/dpa/M. Taga
Потрага по најблиските (Беичуан, Кина)
Мајка го оплакува својот син кој загина во катастрофалниот земјотрес кој ја погоди провинцијата Сичуан во Кина на 19 август 2008 година. Повеќе од 1,500 ученици и учители загинаа во земјотресот, кој севкупно однесе 69 илјади човечки животи.
Фотографија: Getty Images/China Photos
Катастрофата во Хаити
На 12 јануари 2010 година, Хаити беше погоден од катастрофален земјотрес со магнитуда од 7 степени. Над 200 илјади луѓе загинаа во природната катастрофа, а речиси три милиони луѓе беа погодени. Главниот град Порт-о- Принс беше срамнет со земја.
Фотографија: picture alliance/dpa
Земјотресот во Суматра
На 26 декември 2004 година разурнувачки земјотрес со јачина од 9,2 степени го погоди западниот брег на Суматра, во Индискиот Океан. Земјотресот и бројните цунами бранови кои се подигнаа како последица од него однесоа 230 илјади животи во 14 земји. Тоа е третиот најсилен земјотрес забележан во историјата и истовремено, удар со најдолго траење- меѓу 8 и 10 минути.
Фотографија: Getty Images/S. Platt
Музафарабад, Кашмир
Потресот чиј епицентар беше кај градот Музафарабад во Пакистан во октомври 2005 година опфати регион од 30 илјади квадратни километри. Во непосредната околина загинаа 84 илјади луѓе. Земјотресот беше со јачина од 7,6 степени.
Фотографија: AFP/Getty Images/F. J. Brown
Л' Аквила- земјотрес и одговорност
Земјотресот во Л'Аквила, во централна Италија од 6 април 2009 година, однесе 308 човечки животи. Бројни контроверзи следеа по катастрофата, откако 6 научници и еден државен службеник беа осудени на затворски казни поради тоа што не предупредиле на опасноста од земјотресот. Во 2014 година, пресудите на научниците им беа укинати.
