По куса дебата и без присуство на пратеничките групи на опозициската ВМРО-ДПМНЕ, Собранието попладнево им го одзема имунитетот на шест пратеници осомничени од страна на ЈО за упадот во парламентот
Фотографија: picture-alliance/PIXSELL/HaloPix
Реклама
Шестмина пратеници на коалицијата на ВМРО-ДПМНЕ останаа без пратенички имунитет и се соочуваат со притвор, откако мнозинството во Собранието попладнево ја изгласа таквата одлука. Пратениците Крсто Мукоски, Љубен Арнаудов, Јохан Тарчуловски, Жаклина Пешевска, Љупчо Димовски и Сашо Василевски сега се соочуваат со притвор откако беа осомничени од страна на Јавното обвинителство во истрагата за крвавиот упад во Собранието на 27 април годинава.
Кои пратеници помагаа во упадот во Собранието
03:00
This browser does not support the video element.
На снимките кои беа објавени во јавноста по упадот во Собранието можеше да се види дека овие пратеници ги отвораат вратите од Собранието на 27 април. Подоцна тие тврдеа дека не го сториле тоа и дека немаат никаква вина за насилството кое се случи во законодавниот дом, во кое беа повредени повеќе од 100 луѓе.
Тие се соочуваат со казна затвор од најмалку десет години, доколку бидат прогласени за виновни за делото „терористичко загрозување на уставниот поредок и безбедноста“ согласно членот 313 од Кривичниот законик.
Пратениците на ВМРО-ДПМНЕ ќе одговараат за хаосот во Собранието на 27 априлФотографија: Reuters/O. Teofilovski
Вчера, и собраниската комисија за мандатно-имунитетни прашања гласаше за одземање на имунитетот на пратениците.
Кусо обраќање на собраниската седница имаа само пратениците Томислав Тунтев од СДСМ и Артан Груби од ДУИ.
„Тој ден мора да биде расчистен за да можеме оваа темна дамка да ја избришеме. Тоа му го должиме на владеењето на правото, но и на Собранието... Нашата должност е Собранието да застане зад враќањето на правната држава", рече Тунтев, дополнувајќи дека доколку шесте пратеници се убедени во својата невиност, нема од што да се плашат.
Во рамките на истрагата на ЈО за упадот во Собранието, досега се приведени 30 лица, а по шест осомничени се уште се трага. Доцна синоќа, уште тројца од приведените на кои Судот им одреди мерка домашен притвор, беа префрлени во затворски притвор.
Сведоштва за „крвавиот четврток“ во македонскиот парламент
Невидени хаотични слики: Откако мнозинството пратеници го избра пратеникот на ДУИ Талат Џафери за претседател на Собранието, на противење на пратениците од ВМРО ДПМНЕ, во законодавниот дом упадна толпа насилни луѓе.
Фотографија: Reuters/O. Teofilovski
Навала пред вратите на Парламентот
По изборот на Талат Џафери за нов претседател на Парламентот, од иницијативата „За заедничка Македонија“ ги повикаа граѓаните да излезат уште помасовно на протест, со цел да ја спасат државата од, како што истакнаа, влегување во сценарио од кое нема враќање назад. Толпата почна да притиска кон вратите на Собранието за да влезе во него.
Фотографија: Reuters/O. Teofilovski
Слабо присуство на полицијата
Неколку големи групи граѓани влегоа во парламентарната зграда, во пленарната сала, во фоајето и во други простории на парламентот, откако полицијата не го спречи првиот бран од граѓани кои протестираа против изборот на нов претседател на Собранието.
Фотографија: Reuters/O. Teofilovski
Незапирливо „заземање“ на Парламентот
Меѓу оние кои упаднаа имаше и маскирани лица со качулки, кои фрлаа столици во собраниските простории и медиумска опрема.
Фотографија: Reuters/O. Teofilovski
„За заедничка Македонија“ во Собранието
Во закондавниот дом завладеа хаос. Тука беа организаторите на иницијативата „За заедничка Македонија“, тука беа и министри и пратеници на ВМРО-ДПМНЕ.
Фотографија: picture-alliance/dpa/B. Grdanoski
Знамиња и песни
Дел демонстранти ја „зазедоа“ и Пленарната собраниска сала, каде што пееја песни и вееја знамиња.
Фотографија: picture-alliance/abaca/B. Ademi
Напади врз пратениците на СДСМ
Демонстранти навлегоа и во прес-центарот, каде што беа пратениците на СДСМ и ДУИ и почнаа да ги тепаат со столови и со сè што ќе им дојде до рака. Крвнички напаѓани беа Зоран Заев, Дамјан Манчевски, Максим Димитриевски, Радмила Шеќеринска, Хари Локвенец, Зијадин Села. Полиција немаше.
Фотографија: picture-alliance/abaca/N. Batev
Полицијата се „разбуди“
По повеќе од еден час по почетокот на инцидентите, полицајци влегоа во Собранието и се обидоа да ги извлечат пратениците од прес-центарот, но беа избркани од толпата што ги држеше како заложници. Толпата се забарикадира во прес-центарот.
Фотографија: Reuters/O. Teofilovski
Евакуација на повредените пратеници
Некаде пред 22 часот дојдоа и специјалци, па почнаа да се обидуваат да ги вадат повредените од забарикадираниот прес-центар.
Фотографија: Reuters/O. Teofilovski
Извлечени пратениците
Кратко пред полноќ пратениците од парламентарното мнозинство беа извлечени од Собранието, а пред него и понатаму останаа насобраните демонстранти.
Вкупно стотина лица се повредени, од кои четворица се пратеници. Целото Собрание е демолирано, тврдат новинари, од кои дел исто така беа напаѓани.
Фотографија: Reuters/O. Teofilovski
Шатори пред Собранието
Припадници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство, поставија шатори пред Собранието и најавија дека ќе останат таму „колку што е потребно“, за да ја „одбранат Македонија“.
