Последните борби започнаа на почетокот од неделава, откако претседателот Али Абдула Салех повторно одби да стави потпис на спогодбата, која предвидуваше тој да се повлече во рок од еден месец. Во Јемен веќе три месеци траат протестите против шефот на државата, кој владее автократски над 30 години. За него работите се јасни - армијата реагирала на провокацијата од Садик ал Ахмар:

„Тие провокации ќе не` вовлечат во граѓанска војна, но таа е ограничена на синовите на Ал Ахмар, кои го одбраа погрешниот пат, спротиставувајќи се со сила на државата“.

Садик Ал Ахмар е лидер на племенската федерација Хашед, која од март стои на страната на демонстрантите во Јемен. Тој одговорноста му ја префрла на Салех - со одбивањето да се повлече од власт, тој е оној, кој ја турка земјата во граѓанска војна. Во интервју за телевизијата Ал Џазира, Ал Ахмар истакна дека станува збор за напад на владата врз сопствениот народ:

„Ја повикувам армијата, републиканската гарда и безбедносните сили да ни се придружат во борбата против платениците на претседателот Салех, кои се подготвени да ги убијат сопствените браќа.“

САД повикуваат на прекин на огнот

Според непотврдени информации, силите на Ал Ахмар веќе контролираат неколку владини објекти, вклучувајќи го министерството за трговија и туризам, како и канцелариите на државната новинска агенција „Саба“. Борците на Ал Ахмар, исто така, ја нападнале и зградата на Министерството за внатрешни работи, која била под силен оган од рачни фрлачи.

Како точно почнаа престрелките меѓу приврзаниците на Ал Ахмар и државните безбедносни сили, засега останува нејасно. Владата тврди дека луѓето на Ал Ахмар насилно запоседнале училишна зграда, тие, пак, велат дека биле нападнати од владините сили. Во пресметките до сега загинаа стотици лица. Денеска јеменските власти наредија Ал Ахмар и неговите браќа да бидат уапсени.

САД ги повикаа на примирје сите страни, вмешани во конфликтот и уште еднаш побараа претседателот Салех да ја потпише спогодбата за повлекување од функцијата и отворање на патот за мирна транзиција во Јемен.

Автор: Естер Сауб/Трајче Тосев, дпа, ројтерс

Редактор: Горан Чутаноски