Со бугарски пасош до посветла иднина, или можеби не!?
Костадин Делимитов
7 декември 2017
Колку Македонци имаат бугарски пасош, засега нема точен податок. Проценките се движат од 50.000 до над 100.000 граѓани.Бугарскиот пасош важи за „полесен“ пат до европска работна виза
Фотографија: BGNES
Реклама
Двојното државјанство ѝ ги отворило европските порти и на Соња Марковска. Заминала за Грција, па во Данска, но се вратила во Македонија.
„Мотивот да извадам бугарски пасош во тоа време беше во мојата глава. Бев решена да заминам далеку од Македонија, да си ја пробам среќата некаде надвор, бидејќи се` ми алудираше на странство, а не на Македонија. Отсекогаш знаев дека каде и да отидеш, условите се подобри од овде и беше редно да си ја пробам среќата“.
На Соња не ѝ било лесно додека нашла работа во Данска. Иако решила да се врати во Македонија, сепак искуството и е позитивно:
„Не беше лесно, џабе имаш бугарски пасош. Пак ти требаат финансии, луѓе кои ќе гарантираат за тебе. Едноставно, имаш пасош но не и работна дозвола за работа во таа земја. И таму има процедура, се чека месец или два за да добиеш документи, па потоа да бараш работа. Е, работата потоа се наоѓа за ден, два. Се` е полесно“.
Новинарството и мајчинството сега се главна преокупација на Соња. Во моментов работи хонорарно, но не губи надеж:
„Се вратив и сега за сега сме тука. Амбиции имаме можеби за назад, но сега доаѓаат и други обврски како дете и слично. Не е така едноставна процедурата за одново да се вратиш на местото каде што си бил и си работел“.
Македонија- земја на иселеници
Илјадници луѓе секоја година си заминуваат од Македонија во потрага по подобар живот низ земјите на Западна Европа, северна Америка или Австралија. Традицијата не е нова, но во последниве години трендот е растечки.
Фотографија: picture-alliance/dpa/H. Battefeld
Масовно иселување
Според податоците на Светска банка, од прогласувањето на независноста до 2010 година од Македонија се иселиле над 440 илјади луѓе. Трендот последниве години повторно се засилува. Проценките се дека во последниве 5 години, најмалку по 20 илјади луѓе годишно ја напуштаат земјата.
Фотографија: picture alliance/AP Photo/N. Denette
Охрид – неславен рекордер
Во Охрид – градот рекордер по бројот на иселувања во Македонија, неславно рекордна е 2012 година, кога заминале 983 лица. Од Охрид за 11 години се иселени 7860 лица, или по две лица дневно. Најчесто се иселуваат младите.
Фотографија: picture alliance/landov/Z. Yi
Бесперспективност
Според податоците на Светска банка објавени неодамна, невработеноста кај младите во Македонија изнесува 50,08%, додека најновиот извештај на Евростат покажува дека речиси 40% од младите немаат работа, ниту се вклучени во процес на образование. Ваквите состојби поттикнуваат голем дел од нив својата иднина да ја гледаат надвор од државата.
Фотографија: DW/E. Milosevska
Правец Германија
Само во 2015 година, над 24 илјади македонски државјани ја напуштиле својата татковина во потрага по подобар живот во Германија. Од нив, 12 илјади останале. Бројката на македонски доселеници во Германија се приближува до рекордни 100 илјади.
Фотографија: Fotolia/clabert
Sprechen Sie Deutsch?
Според анкети спроведени во регионот и во земјата, германски јазик во Македонија во моментов учат околу 63.500 луѓе. За студирање во Германија потребно е познавање на германски јазик, кое се проверува преку специјални испити ТестДаФ и ДСХ. ТестДаФ се организира во 90 земји, меѓу кои е и Македонија. Но, може да се учи и во Германија.
Фотографија: picture-alliance/dpa/W. Kastl
Јагма за работни визи
Според податоците на ОЕЦД над 17 илјади луѓе од земјите на Западниот Балкан во првата половина од годинава добиле работни визи во Германија. На Македонија отпаѓа над 10 проценти од вкупната бројка. Германските власти им издале точно 1.841 работни дозволи на македонски државјани во првите шест месеци од годинава.
Фотографија: AP
Бугарски пасош
Илјадници Македонци во меѓувреме побараа и добија бугарски пасош, во обид полесно да заминат во некоја од западноевропска земја. Нивниот точен број не е познат, но според неодамнешното истражување на Призма, само во последните 10 години, 57 илјади Македонци земале пасош од источниот сосед. Се проценува дека вкупната бројка надминува 100 илјади луѓе.
Фотографија: Dessie/Fotolia
7 фотографии1 | 7
За искуството со бугарски пасош ретко кој сака јавно да зборува. Дури и оние кои посредуваат и живеат од овој бизнис. Еден од нив се согласи да даде изјава, но само анонимно:
„Работа има многу. До сега сум завршил работа на доста луѓе. Процедурата е едноставна, но сега трае малку подолго. Нема правила, но во последно време малку ги стегнаа критериумите. Се средува се`, но за сигурно најдобро е да се има документ кој потврдува дека имате некоја роднинска врска. Тогаш не е никаков проблем“, вели еден посредник за добивање бугарски пасош.
Бугарскиот пасош важи за „полесен“ пат до европска работна виза. Се` повеќе млади, но и постари бараат излез со овој документ.
„Не се работи ниту за националност ниту за патриотизам. Туку едноставно за гола егзистенција. Затоа цветот на младоста на оваа држава отиде да биде измеќар по белосветските градови,“ реагира еден минувач кого го прашуваме што мисли за темата. Втор дополнува: „Нема нешто што е посебно во тоа, туку тоа е нормално. Условите во оваа држава се потпросечни“.
Колку Македонци имаат и бугарски пасош засега нема точен податок. Проценките се движат од 50.000 па дури до над 100.000 граѓани. Меѓу нив има бизнисмени, јавни личности, па дури и политичари.
