Имено, тројца заменици претседатели на фракцијата на оваа партија, Михаел Милер, Лудвиг Штиглер и Гернот Ерлер, му префрлија на претседателот Келер индискретност и едностраност во полза на демохристијанската партија. Германскиот канцелар Герхард Шредер преку владиниот портпарол Бела Анда нападите врз претседателот веќе ги одби како неподносливи:

„Сојузниот канцелар работи добро и со доверба со сојузниот претседател. Канцеларот има висок респект за личноста на претседателот. Она што го чувме е сосема неприфатлив напад врз сојузниот претседател„.

Во синоќешното интервју за вториот германски телевизиски канал, претседателот на партијата Минтеферинг изјави:

„Мислам дека нападите што дојдоа од некои од нас не се во ред и очекувам тоа да престане„.

Минтеферинг призна дека социјалдемократите се надвор од нормалната рутина, но потврди:

„Герхард Шредер е канцелар и останува и за тоа ќе се бориме на парламентарните избори„.