Одлуката на Вучиќ доаѓа откако во последните 24 часа во Србија починаа 13 луѓе од коронавирусот, што е рекорд за земјата каде досега беа евидентирани 16,700 случаи на инфекцијата.

„Од петок, ќе имаме долг полициски час кој ќе заврши во понеделник“, изјави Вучиќ во телевизиско обраќање. Кризниот штаб на владата ќе одлучува дали полицискиот час ќе важи за целата територија на Србија или само за главниот град Белград.

Новиот бран на вирусот се случи откако властите дозволија масовно олеснување на мерките во пресрет на изборите во јуни. Оттогаш, секојдневно се бележат повеќе од 300 новозаразени дневно.
Поради тоа, со повеќе од 4,000 пациенти заболени од коронавирус, преоптоварен е и здравствениот систем во земјата, вели Вучиќ.

„Никој не може да ги издржи овие бројки. Ние не сакаме да ги убиеме нашите доктори“, изјави Вучиќ. Најсериозна е состојбата во Нови Пазар каде болниците се претрупани со пациенти, а се соочуваат и со недостаток  на опрема. Неколку болници во Белград веќе се целосно пренаменети за прием на заразени со вирусот, а подготвена е и полска болница во Белградската арена.
Истражување на БИРН претходно покажа дека властите во Србија неколку месеци ги криеле вистински бројки на новозаразени и жртви во пандемијата. Владата демантираше дека го правела тоа.

Во понеделникот, и Косово воведе полициски час во вечерните часови во главниот град Приштина и во три други градови.