Од американска страна му беше ветена поддршка за разјаснување на грабнувањето. По средбата со рајс, Штајнмајер изјави:

„Замолив во овој случај на грабнување во Ирак да добиеме информации и географски сознанија од американската страна, што ни беше ветено„ .

Покрај вкупната ситуација во Ирак, Авганистан и за натамошните преговори со Иран за неговата атомска програма, Штајнмајер и Рајс во едночасовните разговори дебатираа и за уште една непријатна тема: наводните тајни транспорти на ЦИА на илегални затвореници преку повеќе европски држави, меѓу нив и Германија. За оваа тема Штајнмајер изјави:

„Се радувам што темата исцрпно ја разгледавме. Мислам дека е важно што не ја избегнавме во овие разговори. Посебно се радувам што беше разбрано дека во европската јавност, но и во парламентите постои загриженост и дека е можно таа загриженост да се смири само ако сето се разјасни. Тоа ни беше ветено„.

Конкретно, Рајс вети брз одговор на писмото од британскиот министер за надворешни работи Џек Стро испратено од името на Европската унија со кое се бара објаснување на ситуацијата. До тогаш темата „илегални транспорти на затвореници„ билатерално нема да се разгледува. На овој начин германското министерство за надворешни работи очигледно сака да го намали притисокот на јавноста, зашто обете страни сакаат безусловно да спречат ново влошување на германско-американските односи.

Уште пред средбата со Штајнмајер, Кондолиза Рајс односите со Германија во моментов ги оцени како одлични. Новиот германски министер соопшти колку се важни и за Берлин позитивните трансатлантски односи:

„Укажав на тоа дека во коалициониот договор констатиравме оти германско-американското партнерство и трансатлантските односи не се во противречност со европската интеграција. За сојузната влада тоа се двата столба на германската надворешна и безбедносна политика„.

Веќе во наредната недела, американската министерка за надворешни рабопти Кондолиза Рајс, за време на европската турнеја, ќе ја посети и Германија.