Според нова студија од Германија, заштитата преку антитела, првенствено по асимптоматска или лесна инфекција со коронавирус, брзо ја снемува. Значи, имунитетот е само ограничен.
Фотографија: picture-alliance/dpa/C. Hardt
Реклама
Оној кој пребродил инфекција со Ковид-19, одредено време е заштитен од наново заболување, зашто телото создало соодветни антитела. Но, по одредено време, овие антитела ги снемува.
Но, тоа не значи дека оздравените немаат веќе никаква заштита, зашто без оглед на отсуството на антитела, т.н. Т-клетки, како еден вид мемориски келии, штитат од повторно заболување.
Нова студија од Германскиот центар за невродегенеративни заболувања од Рајнланд, во околината на Бон, покажува дека секој петти заболен веќе по пет месеци воопшто нема антитела.
Меѓу април и јуни 2020 година кај 5100 возрасни лица од Бон било испитувано присуство на антитела. Кај 22 испитувани лица можеле да бидат докажани „неутрализирачки“, односно посебно ефикасни антитела, кои спречуваат продор на САРС-КоВ-2 во клетките. Но, најголем дел од испитаниците имале само благи или воопшто никкави симптоми, делумно дури и не знаеле дека се инфицирани.
Исклучени други коронавируси
Фактот што се пронајдени овие антитела укажува меѓутоа на претходен контакт со коронавирусот. Тоа е докажано со дополнителен тест кој потврдува дека создадените антитела се специфично насочени против САРС-КоВ-2, а не против други коронавируси, кои со години се присутни во нашата околина и предизвикуваат на пример нормални настинки. Тимот од Рајнланд-студијата притоа работел во тесна координација со Институтот за вирологија на клиниката Шарите во Берлин.
Во септември 2020, односно 120 дена по првата земена проба крв, сите позитивно тестирани од студијата биле подложени на повторна проверка. Кај мнозинството испитаници бројот на неутрализирачки антитела бележел значајно опаѓање. Намалувањето на присуството на антитела укажува на тоа дека имунитетот, по лесна или асимптоматска инфекција со коронавирус, е со ограничено траење.
Комплексен одговор на имунолошкиот систем
Меѓутоа, за имунитетски одговор не е решавачко само присуството на антитела, истакнува д-р Ахмад Азиз, научник од Германскиот центар за невродегеративни заболувања и раководител на студијата: „Намалувањето на присуство на антитела се чини се случува релативно брзо. Но, имунолошкиот систем располага и со други инструменти за одбрана од вируси. Антителата се без сомнение важни, но само дел од вкупниот арсенал. Други студии укажуваат дека друга компонента, која ја нарекуваме целуларен имунолошки одговор, останува присутна и покрај исчезнувањето на антитела.“ Некои луѓе остануваат заштитени од повторно заболување со помош на овие т.н. Т-клетки.
Витамин Ц: Добар за имунитет и за сузбивање на инфекции
Токму во време на Ковид-19 е особено важно да се има функционален имунолошки систем. На телото затоа му се потребни доволно микронутриенти, на пример витамин Ц. А него го има во овошјето и зеленчукот.
Фотографија: picture-alliance/Zoonar/D. Freigner
Јади ме!
Најголем дел од животните - цицачи можат да го синтетизираат витаминот Ц, значи сами да го произведуваат. Но, не и луѓето. Ние мораме да го земаме преку храната. Витаминот Ц го има во киви, портокали и грејпфрут, но и во зеленчук како прокељ, брокула и пиперка. За жал, тој е чувствителен на температура, затоа, внимавајте при готвењето!
Фотографија: picture-alliance/Zoonar/S. Schnepf
Помалку мистерија, повеќе биохемија
Витаминот Ц не е важен само за старите луѓе, болните и вегетаријанците. Неговите биохемиски функции во секое тело се исти и подеднакво важни. Витаминот Ц спаѓа во микронутриенти, кои на организмот не му даваат енергија, но сепак се есенцијални за неговите основни функции. Во нив се вбројуваат метаболизмот и нашиот одбранбен систем.
Фотографија: picture-alliance/dpa/F. Gabbert
Радикален ловец на слободни радикали
Како антиоксидант, витаминот Ц ги редуцира штетите кои ги предизвикуваат т.н. слободни радикали, штетни молекули кои ја нарушуваат структурата на здравите ткива во организмот. Овие радикали настануваат при нормалните процеси на метаболизам. Но штетни материи, како на пример цигарите, водат до оксидативен стрес и зголемено настанување на слободни радикали, па се зголемува и потребата од витамин Ц
Фотографија: picture-alliance/dpa/W. Rothermel
Јагоди за ензимски активности
Витаминот Ц од овие јагоди во човечкото тело не се користи само за заштита од слободни радикали, туку тој е важен т.н. кофактор при цела редица ензимски активности, како на пример синтеза на протеинот колаген. Колагенот е дел од тетивите, коските, рскавицата и кожата. Бавно и лошо заздравување на некоја рана од оваа причина може да е знак за недостиг на витамин Ц во организмот.
Фотографија: picture-alliance/dpa/F. Rumpenhorst
Противнапад со помош на грејпфрут
На телото му е потребен витамин Ц за да може да се одбрани од инфекции. Витаминот Ц не само што е задолжен за заштита на клетките, туку во случај на инфекција преминува и во напад. Тој стимулира преместување на имунолошките клетки, т.н. неутрофили на местото на инфекција, ја поттикнува фагоцитозата - разградување и отстранување на штетните материи и убивање на вирусите.
Поголем недостиг од витамин Ц може да доведе до скорбут. Забавено заздравување на рани, модрици, опаѓање на косата, крварење на непцата и губење на забите, како и болки во зглобовите се симптоми на оваа потенцијално смртна болест. За заштита се доволни веќе 10 милиграми витамин Ц дневно. Доволно витамин Ц во телото значи и помал ризик од висок крвен притисок, срцеви заболувања и мозочни удари.
Фотографија: picture-alliance/dpa/B. Pedersen
Колку е доволно?
Според Централата за заштита на потрошувачите, препорачана дневна доза на витамин Ц за мажите е околу 110 милиграми, за жените - 95. Научниците од Државниот универзитет Орегон пак на сите возрасни им препорачуваат 400 мг витамин Ц дневно. Тврдат, тој е безопасен и ако се „предозирате“, ќе се исфрли преку урината. Нема разлика дали го внесувате преку храната или таблети, велат експертите.