Најмалку три месеци имунитет од корона-вакцината на Модерна
СН/агенции
4 декември 2020
Компанијата Модерна планира да произведе од 100 до 125 милиони дози од својата корона-вакцина во првиот квартал на 2021. Вакцината, која чека дозвола, покажува ветувачки резултати и за имунитетот по вакцинацијата.
Вакцината против Ковид-19 на американската фармацевтска компанија Модерна произведува антитела кои траат 90 дена по вакцинирањето, што е добра вест додека нејзиното одобрување сѐ уште се испитува во некои земји, покажува студијата на 34 учесници во почетните клинички испитувања, објави медицинскиот часопис „New England Journal of Medicine“.
Траењето на заштитата секако е подолга од три месеци, но станува збор за првични продатоци во повеќемесечен период кои независно ги потврди некој научен часопис. Учесниците ќе бидат следени 13 месеци за да се испита заштитата на подолг период, нагласуваат авторите.
Фотографија: picture alliance/AP Photo
Научниците од Националниот институт за здравје ги испитуваа нивоата на два типа антитела на коронавирусот 90 дена по втората доза од вакцината која се зема 28 дена по првата. Тие забележале „лесен“ и очекуван пад на нивото на антитела кај вакцинираните учесници, но и натаму таа била висока. Во т.н. прва фаза на испитувањето кое започна во март, не е забележан некаков сериозен несакан ефект.
Антителата се само дел од имунолошкиот одговор во кој учествуваат Б-лимфоцитите кои создаваат мемориски клетки, како и Т-лимфоцити и клетки убијци. Научниците нагласуваат дека податоците за мемориските клетки сѐ уште не се познати, но претходни студии покажале дека вакцината навистина ги поттикнува клетките убијци.
Седиштето на компанијата Модерна во Кембриџ, во американската сојузна држава МасачусетсФотографија: Matthew Healey/AFP/Getty Images
Врвниот американски инфектолог Ентони Фаучи, неодамна изјави оти е „сигурен“ дека заштитата ќе трае, но оти „не знаеме дали тоа ќе биде една, две, три или пет години“. Времето ќе покаже.
„Ова е, сѐ на сѐ, многу добра вест“, изјави Бенџамин Нојман, професор на тексашкиот иниверзитет АиМ за новата студија, додавајќи дека дури и кај постарите лица имунолошкиот одговор е „прилично силен“.
Модерна, инаку претходно, соопшти дека нејзината вакцина има ефикасност од 94 проценти.
Американската фармацевтска компанија уште соопшти дека планира да произведе од 100 до 125 милиони дози од својата вакцина во првиот квартал на наредната година. Поголемиот дел е наменет за САД, објави вчера компанијата. Обезбедени се меѓу 85 и 100 милиони дози на вакцини за американските граѓани. До крајот на годината, Модерна вели дека сака да произведе 20 милиони дози од својата вакцина против коронавирусот.
Како коронавирусот го промени животот
Пандемијата на коронавирусот го промени од корен начинот на живот на каков што луѓето беа навикнати.
Фотографија: Aleksandra Najdovska/DW
Ставете маска
И покрај тоа што македонските здравствени власти постојано предупредуваат дека носењето маска е важно за превенција од пандемијата на коронавирус, дел од луѓето сѐ уште се противат на носење маски. За неносење маски казната за граѓаните е 20 евра, за правните лица – 2000 евра. Затоа влезовите на продавниците од почетокот на пандемијата се „украсени“ и со вакви предупредувања.
Фотографија: Aleksandra Najdovska/DW
Рестрикции и на отворено
Во С. Македонија маски мора да се носат и на отворено, а забрането е и групирање на јавен простор на повеќе од 4 лица по 21 часот. Не се групирајте, е апел кој постојано се повторува од страна на надлежните. Резултатите се половични – покрај дисцплинираните, сѐ уште има луѓе кои се групираат и не преземаат превентивни мерки. Оваа празна клупа трпеливо чека на крај на пандемијата и рестрикциите.
Фотографија: Aleksandra Najdovska/DW
Здравствена криза, економска криза
Угостителските објекти работат со ограничено работно време – само до 21 часот. Исклучок се оние со сервис за испорака. Празните ресторани и кафулиња ја отсликуваат новата реалност што ја создаде пандемијата на Ковид-19. Многу фирми, посебно малите, се плашат од пропаѓање. Ќе им бидат ли доволни средствата за помош од државата?
Фотографија: Aleksandra Najdovska/DW
Каде се другарите?
Околу 90% од учениците следат онлајн-настава, а без проблеми се одвива и наставата со физичко присуство, тврди министерката за образование Мила Царовска. Пандемијата ја забрза дигитализацијата на образованието. Но, привремено го запре нормалниот детски живот. Како актуелното намалување на социјалните контакти влијае врз детскиот развој ќе биде веројатно предмет на многу истражувања во иднина.
Фотографија: Aleksandra Najdovska/DW
Помала осаменост со домашно милениче
Домашните миленици, во време на затворање дома, можат да бидат добар чувар од психолошкиот стрес што со себе го носи пандемијата. Според студија на универзитетите Јорк и Линколн, 90% од испитаниците сметаат дека домашното милениче им помогнало во емоционалното справување со „локдаунот“, а дури 96% се уверени дека со помош на домашното милениче останале во добра физичка кондиција.
Фотографија: Aleksandra Najdovska/DW
Сѐ за здравје
Од почетокот на пандемијата на Ковид-19, во пораст е побарувачката по витамини и сѐ што може да придонесе за зајакнување на имунитетот. Конзумирањето суплементи стана секојдневна рутина на многумина. Притоа, голем дел од она што го препорачуваат лекарите, не го покрива Здравствениот фонд, туку е приватен трошок. Лекувањето чини пари, превенцијата исто така. Но, сѐ за здравје!
