Германските власти истражуваат како дошло до судирот на два локални воза на југот на Минхен во понеделникот попладне. Досега е потврдена смртта на еден 24-годишен патник, пет лица се здобиле со тешки повреди, а уште 13 се сметаат за полесно повредени. Во вагоните имало вкупно 96 патници.

Двата воза се судриле директно на делница со една пруга, но засега е нејасно како дошло до тоа во исто време да се најдат на таа рута. На снимките од местото на настанот можат да се видат десетина патници како стојат покрај пругата, и најмалку еден вагон кој излетал од шините.

На местото на настанот се ангажирани 680 припадници на разни служби. Патниците во двата вози за локалните медиуми изјавија дека слушнале силен тресок по што биле исфрлени од своите седишта.

Баварскиот премиер Маркус Зедер изрази шок од „ужасните вести“ и им се заблагодари на спасувачките екипи за брзата реакција. Германскиот железнички оператор „Дојче Бан“ најави истрага за инцидентот и им изрази сочуство на жртвите и повредените.