Српскиот претседател Борис Тадиќ денеска во Њујорк изјави дека добил информации според кои терористи од Косово кои избегале од затворите се собираат на локации во северниот дел на Македонија кои ги користеле како бази за време на нападите врз цели во јужна Србија. Тадиќ за ова веќе зборувал со рускиот министер за надворешни работи Сергеј Лавров, а најави дека ќе ги информира и највисоките претставници на ОН. Белград според него е подготвен на одбрана на своите интереси. Српскиот претседател смета дека Белград и Приштина на утрешните директни преговори имаат шанса да ги поместат преговарачките позиции. Денеска во Њујорк на тема Косово ќе разговараат и министрите за надворешни работи на земјите членки на Контакт групата.