Тачи нема лесно да најде коалиционен партнер
9 јуни 2014![](https://static.dw.com/image/17692652_800.webp)
Демократската партија на Косово (ДПК) на Хашим Тачи освои 31,21 проценти гласови, соопшти Централната изборна комисија (ЦИК) на Косово. Тачи е исправен пред трет премиерски мандат, но потрагата по коалиционен партнер нема да биде лесна.
Најголемата опозициона партија, Демократската лига на Косово (ЛДК), според податоците на ЦИК по пребројани 94% од гласовите, освоила 26,31% гласови. Според ова, ПДК во парламентот би имала 35 од вкупно 120 места, додека ЛДК си обезбеди 30 пратенички места. Националистите на Самоопределување ќе имаат 15 пратенички места, а Алијансата за иднината на Косово (ААК) ќе биде застапена со десетмина пратеници во парламентот.
„Ова е победа за Косово“, изјави денеска (9.06) Хашим Тачи. Тој нагласи дека ќе стори се‘ за изградба на држава „каква што граѓаните си посакуваат“. Неговата ПДК сега освои три мандати повеќе отколку што имаше во претходниот состав на парламентот, но и натаму е упатена на коалиционен партнер за да се состави влада. Досега владата на ПДК имаше поддршка на мала албанска партија и повеќе партии на малцинствата.
Трите големи опозициони партии веќе отфрлија соработка со ПДК по изборите. Весникот „Коха Диторе“ пишува дека е сосема отворено кој ќе состави нова влада. „Нема јасни победници“, оценува весникот. Меѓутоа, не е исклучено опозицијата и да се премисли и да го смени ставот кон ПДК.
Со напрегнатост се очекуваше и однесувањето на српското малцинство на овие избори. Многумина од Србите го следеа повикот на Белград и излегоа на гласање. Од околу 120.000 Срби на Косово, според српките медиуми, на гласање излегле околу 53.000. Изборите на северот, каде доминираат Србите, минаа мирно.
Поддршка за успешно спроведување на изборите на северот пружи и ОБСЕ. Шефот на мисијата на ОБСЕ на Косово, Жан-Клод Шлумбергер, изрази задоволство што се‘ мина „мазно“: „Немаше никакви поголеми пријавени инциденти или неправилности. Ова е успех како за Централната изборна комисија, така и за избирачите“, рече Шлумбергер.