Корисниците на Твитер наскоро ќе можат да пишуваат твитови со должина од 280 карактери. Социјалната мрежа се надева дека промената ќе ја зголеми активноста и ќе ѝ овозможи да му парира на Фејсбук
Фотографија: picture-alliance/AP Photo/M. Rourke
Реклама
Откако Твитер изведе серија тестови за зголемување на бројот на дозволените знаци од 140 на 280 во септември годинава, вчера мрежата објави дека ќе ги имплементира промените во речиси сите јазици.
„Го зголемуваме лимитот на карактери! Сакаме да биде полесно и побрзо за секој да се изрази“, соопшти Твитер од својот официјален профил.
Ограничувањето на 140 знаци ќе остане за јапонските, корејските и кинеските корисници, затоа што кај нив тоа и не е голем проблем поради спецификата на азбуките.
Во блог посветен на таа тема, менаџерката на Твитер Ализа Розен вели дека можноста за подолги текстови нема да влијае врз основните карактеристики на мрежата. „Забележавме дека кога луѓето користеа повеќе од 140 знаци, твитаа побрзо и почесто“, вели таа. „Но поважно, луѓето најчесто твитаа под 140 карактери и концизноста на Твитер остана“.
Ко-основачот на Твитер Биз Стоун напиша дека подолгиот лимит имал позитивен ефект и врз активноста на мрежата. „Освен повеќе твитање, луѓето кои имале 280 карактери добиле повеќе ретвитови, споменувања, следбеници и лајкови, и биле позадоволни од Твитер. Затоа и вие ќе добиете 280- уживајте“.
Засега останува нејасно кога целосно ќе биде имплементирана промената, иако се очекува да биде овозможена за мобилните корисници при следниот апдејт на апликацијата.
Твитер е под притисок да ги зголеми приходите од реклами и да привлече нови корисници, затоа што далеку заостанува зад својот голем ривал- Фејсбук. Твитер е популарен меѓу новинарите и политичарите, но Фејсбук и натаму доминира меѓу широките маси. Во споредба со околу 2 милијарди активни корисници на Фејсбук месечно, Твитер може да се пофали со само 330 милиони.
Твитер досега не успеваше да стане профитабилен, иако месецов соопшти дека успеал да ги намали загубите. Најавено е дека дури би можел да стане и профитабилен до крајот на годинава, за првпат од основањето во 2006 година.
Незаборавни моменти од историјата на Твитер
На 21 март 2016, Твитер наполни 10 години. Од политика до забава, овие твитови беа спонтани реакции на светските настани опишани во карактеристичните 140 знаци.
Ко-основачот и директор на Твитер, Џек Дорси или едноставно @jack, го постираше првиот твит воопшто на 21 март, 2006 кој гласеше: "„само го поставувам твитер“, „just setting up my twttr." Многу други корисници на платформата за микроблогинг ги започнаа своите приказни со слична порака, но овој доби десетици илјади ретвитови.
Фотографија: Twitter/jack
'Најдобрата фотографија воопшто'
Американската ТВ водителка Елен Деџенерис го постираше ова селфи од доделувањето на Оскарите во 2014, кое го нарече „најдобрата фотографија воопшто“, и неверојатен број луѓе се согласија. Твитот со фотографијата на некои од најпознатите светски актери имаше повеќе од 3 милиони ретвитови и стана најуспешниот на сите времиња.
Фотографија: Twitter/TheEllenShow
#Египет
Ексцентричната забава на Твитер добро функционира, но бројни твитови се бават и со многу сериозни теми. За време на Арапската пролет, #Египет беше користен на Твитер од страна на локалните активисти и новинарите за да информираат за падот на режимот во земјата.
На 7 јануари, 2015, двајца исламистички милитанти влегоа во канцелариите на францускиот сатиричен магазин „Шарли Ебдо“ и убија 11 луѓе. Преку хаштагот #jesuischarlie на Твитер беше изразувано сочуство за жртвите од масакрот. Неколку недели по нападите, хаштагот веќе имаше преку 5 милиони споменувања на Твитер.
Фотографија: DW/E. Servettaz
Живо од теренот
По победата на Мундијалот 2014 во Бразил, германските ѕвезди Лукас Подолски и Бастијан Швајнштајгер го постираа ова победничко селфи од самиот терен. Не само што им се оствари сонот на теренот, туку нивниот твит беше ретвитуван уште 80 илјади пати.
Првиот син на принцот Вилијам и неговата сопруга Кејт се роди на 22 јули 2013. Напуштајќи ја праксата веста најпрво да биде соопштена пред Бакингемската палата, раѓањето на Џорџ беше објавено на Твитер. „Нејзиното кралско височество Војвотката од Кембриџ роди син во 4:24 часот“. Сличен твит беше објавен и за раѓањето на Шарлот во 2015 година.
Фотографија: Reuters/S. Plunkett
Уште четири години за Барак Обама
Американскиот претседател ја постираше фотографијата во која ја држи во прегратка сопругата Мишел по реизборот за втор мандат на функцијата во ноември 2012. Пораката беше ретвитувана 800,000 пати, и е еден од најуспешните твитови воопшто.
Фотографија: Twitter/BarackObama
Победнички совет
Некои од најуспешните твитови се многу едноставни, во рамките на ограничувањето од 140 карактери. Во 2011, оваа куса мотивациска порака замина во етерот: „Никогаш не се плаши да сонуваш“. Секако, за нејзината популарност придонесе и авторката на твитот: Стефани Џерманота, ака Лејди Гага.
