Токсични дизел гасови биле тестирани врз луѓе и животни
БГ
29 јануари 2018
Луѓе биле изложени на токсични гасови во експерименти организирано од група финансирана од германски автопроизводители. Според шокантните откритија претходно такви тестови биле вршени и врз мајмуни.
Според извештаите во германските весници Штутгартер цајтунг и Зиддојче цајтунг, луѓе биле изложени на отровни гасови од дизел возила за време на експеримент „меѓу 2012 и 2015 година“, финансиран од група германските автопроизводители.
Автомобилските производители оцениле дека имаат интерес да се докаже дека користењето на модерна технологија ги прави безопасни емисиите на издувни гасови од дизел возила. Тестовите биле побарани од Европската група за истражување на животната околина и здравјето во транспортниот сектор (ЕУГТ)- во меѓувреме расформирана организација- а финансирана од германските производители Фолксваген, Дајмлер и БеЕмВе.
Експериментите биле фокусирани на „краткорочна инхалација на азотен диоксид од страна на здрави луѓе“, пишуваат весниците. Потоа, универзитетска болница во градот Ахен ги испитувала 25-те лица кои инхалирале одредени количества гас во текот на неколку часови.
Јавноста дозна за овие експерименти откако претходно беше откриено дека такви тестови за вршеле и врз здрави мајмуни кои морале да вдишуваат токсични гасови.
Реагирајќи на обвинувањата, од Фолксваген со изјава соопштија дека „се убедени оти научните методи одбрани во тоа време биле погрешни“.
Од Дајмлер соопштија дека „се шокирани од опфатот на овие студии и начинот на кој биле изведувани“. „Остро ги осудуваме овие тестови“, соопшти компанијата, додавајќи дека немала никаков увид во методите и мерките кои биле преземани од групата ЕУГТ, а кои биле „против вредностите и етичките принципи на Дајмлер“.
Дајмлер тврди дека отворил истрага за тестовите врз мајмуни и луѓе кои ги смета за „излишни и одбивни“.
Дизелите интересни само за балканскиот пазар
02:32
This browser does not support the video element.
Германците и нивните автомобили
Без оглед на скандалот со дизел горивото, автомобилите се дел од германскиот национален идентитет. Но колку е навистина длабока љубовта на Германците кон пријателите на четири тркала?
Удар за автомобилската индустрија
Репутација на славните германски автопроизводители доживеа голем удар, но продажбата и натаму расте. Сепак, германските брендови сочинуваат помалку од две третини од сите возила на германските патишта. Притоа се работи за чисто машка „територија“: само една третина од сопствениците на возила во 2017 година се жени. Интересно, таа бројка воопшто не се промени во последната деценија.
Фотографија: picture alliance/dpa
Една деценија на пат
Германските патнички возила, полека старееја, од 8,1 година во просек пред една деценија, до највисокиот просек во историјата од 9,7 години во 2017. Патем, Германија воопшто не е во светскиот врв според возила по глава на жител. Таа е на 20 место - 17 места зад САД, каде на секои десет жители има осум автомобили. Најмалку моторизирана земја во светот е Того.
Земја на олдтајмери
Околу 600 илјади возила - околу 13 проценти од сите возила на германските патишта се сметаат за олдтајмери, што значи дека се постари од три децении. Околу 380 илјади имаат историски регистерски таблички кои се добиваат доколку се докаже дека возилото е сочувано со оригиналната состојба.
Фотографија: Imago/imagebroker/friederich
Постепена моторизација
На 1 јануари 2017, во Германија беа регистрирани 45,8 милиони патнички возила. Во однос на населението од 82,8 милиони, тоа значи дека има 684 автомобили на илјада жители. Денес, има пет пати повеќе автомобили во земјата отколку пред половина век, кога беа регистрирани околу 9 милиони возила.
Во земјата на БМВ
Просечната старост на возилата во Германија варира од покраина до покраина. Веројатно не е изненадување што во Баварија, домот на БМВ и покраина со најголем приход по глава на жител, просекот на старост на возилата е најмал. Просечната старост на возилата на патиштата во Бранденбург, покраината околу Берли, надминува една деценија.
Фотографија: picture alliance/dpa/A. Gebert
Германија заостанува
Иако бројот на возила на бензин остана стабилен во последната деценија, нивниот удел се намали на две третини од сите мотори во 2017. Бројот на дизел возила порасна од 10 на 15 милиони од 2008 наваму. Електричните и хибридните возила комбинирано сочинуваат само 0,5 проценти, или вкупно 200 илјади. Во Норвешка уделот на електричните возила е повеќе од 1 процент.
